“LUM”, aty ku zëri i Hersi Matmujës takon violonçelin italian të Jacopo Conocit

Në një lidhje direkte nga Italia për “ABC e Mëngjesit”, këngëtarja Hersi Matmuja zbuloi projektin më intim dhe më të pasur artistik të karrierës së saj: albumin e ri “LUM”, një dialog pa kohë mes zërit të saj shqiptar dhe violonçelit të bashkëshortit të saj Jacopo Conocit. Një album me 10 këngë, ku tradita, historia dhe liria krijuese bashkohen në një udhëtim që kalon kufijtë gjeografikë dhe kohorë.
“LUM” nuk është thjesht një disk, por një hartë emocionale e Europës Juglindore. Udhëtimi nis në veriun e Shqipërisë, në rajonin e Lumës, me zemër qytetin e Kukësit, për t’u ndërthurur më pas me kulturën arbëreshe, të transplantuar në Italinë e Jugut që në shekullin XV, kur komunitetet shqiptare u larguan nga pushtimi osman. Albumi vijon ndalesën në Salento, për të përfunduar simbolikisht në Shkodër, në veriperëndim të Shqipërisë.
Në këtë projekt, muzika popullore takon muzikën e kultivuar, frymëzuar edhe nga veprat e Tish Daisë dhe Ramadan Sokolit, duke sjellë një rishfaqje moderne të këngëve që mbajnë brenda kujtesën kolektive shqiptare. Këngë si “Çike o mori çike”, “Struka e çuces”, “Shëjvi”, “Vare vare”, “Prej zamanit” e të tjera, vijnë për herë të parë në një variant bashkëkohor, pa humbur shpirtin e origjinës.
“LUM” është një fjalë e vogël, por me kuptime të mëdha: gëzim, urim, bollëk. Dhe pikërisht këtë ndjesi përcjell albumi, një pasuri emocionesh, historie, kulture dhe humanizmi. Për Hersin dhe Jacopon, ky projekt nuk është vetëm art, por trashëgimi. Një dhuratë për kujtesën dhe për brezat që vijnë.