Loading ...
Natyrisht, asgjë nuk ka përfunduar, përkundrazi.
Në Serinë A janë luajtur vetëm gjashtë javë, e mbeten plot 32 të tjera, ndonëse tifozët dhe mediat gjithnjë jetojnë momentin.
Ky çast nuk ishte aspak i lumtur për Milanin, i cili humbi terren në garën për titull, edhe pse një barazim në fushën e Juventusit nuk mund të cilësohet si negativ.
Gjithsesi, trajneri Masimiliano Alegri pati kritika për lojtarët e tij, sidomos për Rafael Leaon që humbi raste, ndërsa më flagrante ishte shpërdorimi I penalltisë nga ai që cilësohej si më I sigurti, Kristian Pulishiç.
Duelin në Torino, që për statistikat ishte I barabartë, duhej ta kishte fituar Milani që pati rastet dhe ishte më lart, ndërsa për “Zonjën e Vjetër” erdhën vërshëllimat e para.
Gjithsesi, Derbi i Italisë u mbyll pa gola, dhe nga kjo përfituan rivalët.
“Kush arratiset, dhe kush gabon”, titullon “La Gazeta delo Sport”, që vlerëson napolitanët si edhe Romën, ndërsa kritikon Milanin: Hodhi tej tri pikë, Juventusi falenderoi!
“Il Korriere delo Sport” lavdëron trajnerin e Romës, Gasperini, si e papritura e sezonit: Roma dhe Napoli, kreu I ndarë në dysh, Tudor falenderon Pulishiçin!
Ata që provojnë arratinë janë pikërisht Napoli e Roma.
Skuadra e trajnerit Antonio Konte fitoi 2-1 ndaj Xhenoas në stadiumin “Maradona”, duke përmbysur rezultatin, pra me karakter.
Ehator shënoi për ligurët në 33’, por pas pushimit erdhi reagimi i kampionëve.
Anguisa dhe Hojlund realizuan dy herë në një sukses të merituar.
Napoli dhe Roma kanë nga 15 pikë në krye të renditjes së Serisë A, Milani ka 13, ndërsa Interi e Juventusi ndjekin me nga 12 pikë./abcnews.al
