Loading ...
Kur i vjen momenti, di ta shfrytëzojë. Ky ishte vlerësimi I portierit rival, David Volk, për Mirlind Dakun, pasi ai I shënoi gol në duelin e Premier Ligës së Rusisë.
Rubin fitoi 1-0 ndaj rivalit Dinamo të Mahaçkallës pikërisht falë penalltisë së realizuar nga sulmuesi I kombëtares shqiptare, dhe vazhdon të jetë në garë për kualifikim në kupat e Europës, pse jo edhe për titull.
Për kontributin që dha, vetë Premier Liga ruse e shpalli Dakun lojtarin më të mirë të ndeshjes, diçka që e shpërndau me krenari në rrjetet sociale edhe klubi I Rubinit.
Vlerësimet e mediave ishin padyshim të larta, duke e cilësuar 27-vjeçarin si futbollistin vendimtar të ekipit, dhe njërin nga më të mirët e kampionatit. Ka qenë titullar në çdo duel dhe ka 99 për qind të minutazhit të mundshëm. Ky sezon vërtet duhet veçuar për shqiptarin nga Kosova, e mund të sjellë arritje të rëndësishme.
Daku ka 7 gola në 8 ndeshje në Premier, duke qenë për momentin në të njëjtin nivel me yllin e Lokomotivës moskovite, Aleksei Batrakov, të dy në vend të parë në garën për Këpucën e Artë.
Këtyre u shtohet edhe një asist, dhe duket qartë se sulmuesi është në ligën ruse si në shtëpinë e tij.
Jo më kot, në total ka 32 gola e 13 asistë në 62 ndeshje. / abcnews.al /
