Këngëtarja shqiptare me famë botërore Rita Ora ka bërë homazhe Liam Payne-it në mbrëmjen e MTV Europe Music Awards (EMAs) të këtij viti që u mbajt në Mançester.
Ky aktivitet u mbajt pothuajse një muaj pas vdekjes së yllit të “One Direction”. Këngëtarja e njohur Rita Ora bashkëpunoi me Payne në këngën e tyre që u bë më pas hit i vitit 2018, For You. Rita Ora e kujtoi si “një nga njerëzit më të sjellshëm që ka njohur”.
Liam Payne, i cili arriti sukses të madh me One Direction nga viti 2011 deri në 2016, nisi karrierën e tij solo me performancën e këngës së tij debutuese “Strip That Down” në MTV EMA të vitit 2017.
Kjo këngë, e kompozuar nga Ed Sheeran, u bë një hit, duke e shënuar Liamin me gjashtë këngë në Top 40 në Mbretërinë e Bashkuar si artist solo.
Pas lajmit të trishtë të vdekjes së Liam në Buenos Aires, Argentina, fansat anembanë botës kanë nderuar kujtimin e tij. Memoriale të veçanta u mbajtën në Londër, Manchester, Birmingham dhe Glasgow.
