Është padyshim një fitore e madhe, duke llogaritur edhe faktin që luajnë larg “shtëpisë” së tyre.
Pas triumfit 4-0 në Qipro, “Dardanët” e Kosovës kanë siguruar tre pikëshin e radhës, në UEFA Nations League, teksa këtë herë kanë mundur skuadrën e Lituanisë me rezultatin e ngushtë 2-1.
Edon Zhegrova dhe Ermal Krasniqi ishin protagonistët absolut të fitores në “Dariaus Gireno stadionas”, të Kaunasit, me golat e tyre në minutat 20’ e 65’, ndërsa për vendasit goli i “nderit” erdhi në minutën e 84’-të, nga këmbët e mesfushorit 25-vjeçar, Paulius Golubickas.
Falë këtij rezultati, Kosova ngjitet në vendin e dytë të tabelës së Grupit C2, në Nations League, me 6 pikë, po aq sa Rumania kryesuese, ndërsa pas tyre vijnë Qipro e Lituania me 3 dhe 0 pikë. /i.m /abcnews.al
