Udhëheqësja franceze e ekstremit të djathtë, Marine Le Pen tha sot se ajo ka besim se partia e saj do të fitojë një shumicë absolute në parlament, do të formojë një qeveri dhe do të vendosë kufizime në atë që presidenti francez Emmanuel Macron mund të bëjë për të mbështetur Ukrainën.
“Sa i përket zgjedhjes së kryeministrit, presidenti e kuptoi se nuk ka shumë zgjedhje, sepse Jordan Bardela do të ketë një mandat nga populli francez”, tha Le Pen për gazetën rajonale “Telegram de Brest”.
Sondazhet e opinionit sugjerojnë vazhdimisht se Tubimi Kombëtar kundër emigrantëve dhe euroskeptik (RN) ka një epërsi për sa i përket përqindjes së votave, me koalicionin e krahut të majtë në vendin e dytë dhe centristët e Macron në të tretin.
Megjithatë, e panjohura e madhe është nëse RN mund të fitojë një shumicë absolute prej 289 ose më shumë vendesh në asamble.
Sondazhi i fundit, i publikuar dje nga agjencia e hulumtimit të opinionit publik “Ifop”, parashikon se RN me aleatët e saj do të marrë nga 220 deri në 260 vende parlamentare.
Macron do të mbetet president pas zgjedhjeve të jashtëzakonshme parlamentare të mbajtura më 30 qershor dhe 7 korrik. Macron ka thënë vazhdimisht se do të qëndrojë president deri në vitin 2027, pavarësisht nga rezultati i zgjedhjeve./abcnews.al
