Në takimin me ekipet e Shërbimit Zjarrfikës dhe Shpëtimit në qarkun Fier, Ministri i Brendshëm Taulant Balla kërkoi gatishmëri dhe ndërhyrje të menjëhershme në çdo vatër zjarri.
Ai kishte një apel dhe kujtesë publike për qytetarët, se zjarrvënia është një krim i cili dënohet ashpër nga Kodi Penal.
“Standardin e vendosur vitin e kaluar, numrin rekord të personave të proceduar penalisht ta ngremë në një nivel tjetër. Kushdo që s’ka venë mend dhe tenton me dashje a pa dashje të ndezë një shkrepse për t’i vënë zjarrin disa mbetjeve bimore, pa shkuar tek ata që e bëjnë me qëllim, duhet t’u japim një mesazh shumë të qartë që Kodi Penal parashikon dënime shumë të ashpra”, tha ministri Balla.
Ministri kërkoi angazhim edhe nga punonjësit e policisë për të zbuluar dhe arrestuar zjarrvënësit.
“Do të bëjmë gjithçka për të transformuar infrastrukturën, mjetet, pajisjet, veshjet e punonjësve të MZSH-së. Kemi filluar një proces ristrukturimi, trajnimi. Ua kam thënë kryetarëve të bashkive, e po e përsëris edhe këtu në Fier se shërbimi zjarrfikës është jetik, e koha kur me MZSh bëheshin qoka e kur të Shërbimin Zjarrfikës punësoheshin ata që nuk donin të shkonin në punë tjetër ka mbaruar”, theksoi Ministri.
Nga Fieri ministri Balla, përsëriti lutjen drejtuar qytetarëve për të dhënë kontributin e tyre, duke ndihmuar në eliminimin e rrezikut që në fazat e para, përmes Shërbimit Vullnetar Zjarrfikës./abcnews.al
