Agjencia e Kombeve të Bashkuara për refugjatët palestinezë (UNRWA) ka raportuar vdekjen e 193 punëtorëve të saj në Rripin e Gazës që nga fillimi i konfliktit midis Izraelit dhe Hamasit, numri më i lartë në historinë e OKB-së.
“Gaza është vendi më i rrezikshëm në botë për punëtorët humanitarë”, shkroi UNRWA në X.
Përveç 193 anëtarëve të UNRWA, të paktën tridhjetë punonjës të emergjencës palestineze të Gjysmëhënës së Kuqe u vranë nga sulmet izraelite. Sipas Zyrës së Kombeve të Bashkuara për Koordinimin e Çështjeve Humanitare (OCHA), armiqësitë në Gaza në zona me popullsi të dendur përbëjnë një kërcënim të madh për civilët, duke përfshirë punonjësit e ndihmës, dhe minojnë qasjen dhe operacionet humanitare.
Organizata të ndryshme si Human Rights Watch (HRW) kanë denoncuar sulmet kundër punonjësve të tyre humanitare nga forcat e armatosura izraelite për muaj të tërë, edhe kur ato ua kishin komunikuar të dhënat e kontaktit autoriteteve në mënyrë që të garantonin mbrojtjen e tyre.
Një nga rastet më të njohura ishte sulmi më 1 prill kundër një kolone të World Central Kitchen, OJQ-së së shefit Josè Andres, në të cilin vdiqën shtatë persona./abcnews.al
