Izraeli beson se më shumë se një e treta e pengjeve të mbetura në Gaza kanë vdekur, sipas një raporti të qeverisë. Nga rreth 250 personat e rrëmbyer nga Rripi i Gazës nga persona të armatosur nga grupi palestinez Hamas më 7 tetor, disa dhjetëra u liruan në nëntor, ndërsa të tjerët u gjetën të vdekur ose të gjallë nga ushtarët izraelitë.
Sipas raportit të qeverisë, 120 janë ende në duart e Hamasit, nga të cilët 43 janë shpallur të vdekur ose të zhdukur nga zyrtarët izraelitë bazuar në burime të ndryshme informacioni, duke përfshirë inteligjencën, pamjet e kamerave të sigurisë ose videot e dëshmitarëve okularë dhe analizat laboratorike të eshtrave.
Madje disa zyrtarë kanë deklaruar se numri i të vdekurve mund të jetë më i lartë.
Hamasi, i cili në fillim të luftës kërcënoi se do t’i ekzekutonte pengjet si hakmarrje për sulmet ajrore izraelite, që atëherë ka thënë se sulmet ishin përgjegjëse për vdekjen e pengjeve.
Izraeli nuk e ka përjashtuar këtë mundësi për të gjitha rastet, por ka vënë në dukje se në disa nga trupat e pengjeve kanë gjetur shenja ekzekutimi. Presidenti i SHBA Joe Biden tha publikisht të premten se propozimi izraelit për armëpushim do të përfshinte lirimin e një numri pengjesh.
Por përpjekjet e ndërmjetësve për të arritur një marrëveshje të tillë kanë ngecur pasi Izraeli këmbëngul për rifillimin e sulmeve për të eliminuar Hamasin, ndërsa grupi islamik kërkon fundin e luftës dhe tërheqjen e të gjitha forcave ushtarake izraelite.
/abcnews.al
