Loading ...
Presidenti i Ukrainës, Volodymyr Zelenski bën thirrje për më shumë mbrojtje ndërsa ushtria ruse vazhdon sulmet brutale në Kharkiv. Ai thotë se Rusia po përfiton nga mungesa e mbrojtjes ajrore të Ukrainës ndërsa shton se kjo nuk është vetëm një dobësi e vendit të tij por edhe e botës.
“Një sulm jashtëzakonisht brutal rus në Kharkiv dhe Lyubotyn. Sipas të dhënave paraprake, Rusia lëshoi 15 raketa menjëherë. Fatkeqësisht, ka viktima. Shërbimet e urgjencës kanë mbërritur tashmë në vendin e sulmeve dhe të gjithë të lënduarit do të marrin ndihmën e nevojshme. Terroristët rusë po përfitojnë nga mungesa e mbrojtjes ajrore të mjaftueshme të Ukrainës dhe aftësia e besueshme për të shkatërruar raketat e terroristëve në vendndodhjet e tyre të sakta, të cilat janë afër kufijve tanë.
Dhe kjo dobësi nuk është e jona, por e botës, e cila prej tre vitesh nuk ka guxuar të merret me terroristët ashtu siç e meritojnë. Terrori duhet të humbasë kudo, në çdo kusht dhe në të gjitha kontinentet. Kjo është përgjegjësia jonë e përbashkët – ajo e kujtdo në botë që ka aftësinë për të mbrojtur jetën nga terrori. Ukraina po bën gjithçka që mundet. I jam mirënjohës të gjithëve që po na ndihmojnë. Por ne kemi nevojë për më shumë vendosmëri, veçanërisht nga liderët botërorë.“, thotë Zelensky.
