“Zikaltërit” e Inter arritën një fitore spektakolare, mbrëmjen e së dielës, që sapo lamë pas, teksa në stadiumin “Diego Armando Maradona” mundën me rezultatin e thellë, 3 me 0, kampionët në fuqi të Italisë, Napoli, duke rikonfirumar edhe një herë dominancën, në Serie A, pas një barazimi të “vakët” ndaj “bardhezinjve” të Juventus.
Sukses ku dha kontribut të madh edhe portieri “helvet”, Yann Sommer, i cili me pritjet e tij fantastike ka impresionuar jo pak edhe “legjendën” e sulmit “zikaltër”, Diego Milito, i cili e ka krahasuar zvicerianin, me portierin e sezonit të kaluar, Andre Onana, teksa shtoi se 34-vjeçari i portës është më i mirë se kamerunasi.
“Sommer nuk e ka patur të lehtë, sepse zëvendësonte një portier që kishte mbërritur në finalen e Champions League. Pavarësisht kësaj, Sommer po performon shumë mirë, mos të them edhe më mirë se Onana. Mos të harrojmë se është një portier i ardhur nga Bayerni, por për mua është një surprizë e madhe”,- u shpreh “legjenda” e Inter. /i.m /abcnews.al
