Të paktën tre persona u vranë sot në Kiev nga rrëzimi i pemëve dhe dhjetëra komunitete mbetën pa energji elektrike, për shkak të stuhive të forta në Ukrainë dhe bombardimeve ruse në atë vend.
Ndërsa kushtet e motit u përkeqësuan, 1,880 komunitete në 16 rajone, përfshirë atë të Kievit, nuk kanë energji elektrike, tha Ministria e Brendshme në një postim në Telegram.
Rajonet më të prekura janë ato të Khmelnytskyi, Rivne dhe Lviv, në Ukrainën perëndimore. Në mëngjes Ministria e Energjisë njoftoi se të paktën 300 mijë persona kanë mbetur pa energji elektrike.
Tre persona humbën jetën dhe 10 të tjerë u plagosën nga rrëzimi i pemëve nga erërat e forta.
Infrastruktura ukrainase është shënjestruar nga bombardimet ruse që nga pushtimi në dimrin e 2022, duke lënë mijëra njerëz shpesh pa energji elektrike dhe ngrohje. Edhe pse pjesa më e madhe e rrjetit është restauruar, qeveria pret bombardime të reja në dimër dhe po kërkon nga aleatët perëndimorë të vendit t’i ofrojnë atij sisteme të mbrojtjes ajrore.
