Napoli la pas krahëve humbjen e mesjavës kundër Cagliarit dhe fitoi 2-1 përballë Brescias. Mertens dhe Manolas ishin autorët e golave, që ngjitën ekipin e Ancelottit në kuotën e 12 pikëve, ndërsa Balotelli përhapi frikë në San Paolo me golin e tij.
Trajneri i Napolit është i kënaqur me fitoren dhe pranon se minutat e fundit ishin të vështira. Ai vendosi të mbronte me 5 lojtarë dhe Napoli ia doli të siguronte fitimin e ndeshjes.
“Vuajtja në këtë lloj ndeshje është normale. Nëse nuk shënon golin për 3-0 dhe pëson gol, vështirësitë shtohen deri në fund. Ishte shumë ngrohtë dhe të dy skuadrat bënë një sforco të madhe.
Jam i kënaqur me çfarë pashë në këtë përballje. Në minutat e fundit mbrojtëm me 5 veta. Surpriza e madhe? Di Lorenzo. Ai përshtatet me çdo rol dhe nuk ka nevojë për shumë shpjegime. Lojtarë të tillë janë të rrallë”, përfundon Carlo Ancelotti. /abcnews.al
