Një uragan me erëra me shpejtësi 130 mph (215 km/h) po vërshon drejt Meksikës dhe SHBA-së jugperëndimore. Stuhia e kategorisë 4, e quajtur Hilary, parashikohet të zbarkojë fillimisht në Baja California, një shtet meksikan, të shtunën.
Meteorologët thonë se më pas do të humbasë shpejtësinë dhe do të shndërrohet në një stuhi tropikale, duke lëvizur drejt Kalifornisë jugore, ku janë paralajmëruar përmbytje.
Kjo do të ishte stuhia e parë tropikale që godet Kaliforninë në më shumë se 80 vjet. Agjencia Federale e Menaxhimit të Emergjencave (Fema) ka “personel dhe furnizime të paracaktuara në rajon dhe ata janë të gatshëm të përgjigjen sipas nevojës”, tha të premten Presidenti Joe Biden.
“I bëj thirrje të gjithëve në rrugën e stuhisë që të marrin masa paraprake dhe të dëgjojnë udhëzimet nga zyrtarët shtetërorë dhe lokalë.”
Shërbimi Kombëtar i Motit (NWS) tha se potenciali për shi të dendur, që varion nga 3-6 inç (7-15 cm) në disa zona dhe deri në 10 inç në të tjera, mund të çojë në ndikime “të rëndësishme dhe të rralla” për disa pjesë të Kalifornisë jugore dhe Nevadas jugore.
Në San Diego, NWS ka lëshuar një paralajmërim për “potencial të lartë” të përmbytjeve të shpejta.
