Juventus ka mbyllur në mënyrën më të mirë të mundëshme turneun në Shetet e Bashkuara të Amerikës. “Zonja e Vjetër” mundi 3-1 Real Madrid në miqësoren e fundit, duke dhënë sinjale të rëndësishme në prag të sezonit të ri të Serisë A, që kërkon ta jetojë ndryshe pas problemeve të mëdha që kaloi brenda dhe jashtë fushës.
Po ashtu, trajneri Alegri mori mesazhe pozitive nga tre sulmuesit e tij që gjetën rrugën e rrjetës. Kean hapi serinë e golave që në minutën e parë për epërsinë e juventinëve.
Në minutën e 20-të ishte Ueah që dyfishoi shifrat, duke festuar golin e parë në aventurën e tij me skuadrën bardhezi. Madrilenët arritën të ngushtojnë diferencën në fundin e pjesës së parë me të zakonshmin Vinicius Zhunior.
Rezultati do të mbetej i pandryshuar deri në fundin e kohës së rregullt, ndërsa në shtesë kishte kohë edhe për lavdinë e Vlahoviç, i cili realizoi golin e tretë për Juventus. Një fitore e rëndësishme dhe prestigji për “Zonjën e Vjetër” që kthehet në Itali me më shumë besim te forca e saj.
