Shalqiri është një èmbëlsirë freskuese e preferuar e verës, por kur bëhet fjalë për farat e tij, jemi të sigurt që do t’i hidhni si shumica.
Por ky është një gabim sepse ato janë të pasura me vlera ushqyese. Farat e shalqirit janë të ulëta në kalori dhe të pasura me lëndë ushqyese. Është interesante se ato mund të hahen edhe të pjekura. Pastaj janë krokante dhe mund të zëvendësojnë ushqimet e tjera jo të shëndetshme.
Siç e kemi përmendur tashmë, farat e shalqirit janë të ulëta në kalori. Një grusht farash peshon rreth 4 gram dhe përmban vetëm 23 kalori, që është shumë më pak se një qese me patatina. Nëse dëshironi t’i piqni, shpëlajini dhe thani. Kur të jenë tharë plotësisht i lyejmë me pak vaj ulliri dhe i shpërndajmë në mënyrë të barabartë në tepsi. I kriposim dhe i pjekim në furrë të nxehur në 160 gradë për 10 deri në 15 minuta. Mos ngurroni të luani me erëza si djegës, kanellë apo edhe sheqer.
Farat e shalqirit janë të pasura me magnez. Në një porcion prej 4 gramësh, do të merrni 21 miligramë magnez, që është 5 për qind e marrjes së rekomanduar ditore. Magnezi është thelbësor për shumë funksione metabolike në trup. Është gjithashtu i nevojshëm për të ruajtur funksionin e nervave dhe muskujve, si dhe për shëndetin e zemrës dhe kockave, si dhe për imunitetin.
Farat e shalqirit përmbajnë gjithashtu hekur, i cili transporton oksigjenin në të gjithë trupin dhe ndihmon trupin të konvertojë kaloritë në energji. Një grusht me fara shalqiri përmban rreth 0,29 miligramë hekur, ose rreth 1,6 për qind të marrjes së rekomanduar ditore.
Farat e shalqirit janë gjithashtu një burim i mirë i acideve yndyrore të pangopura, një grusht i madh (4 gramë) përmban 1,1 gram prej tyre. Meqë ra fjala, këto yndyrna janë të dobishme për mbrojtjen kundër sulmit në zemër dhe goditjes në tru, si dhe për uljen e nivelit të kolesterolit të keq në gjak.
Së fundi, farat e shalqirit janë një burim i mirë i zinkut, një lëndë ushqyese thelbësore për sistemin imunitar. Një grusht farash përmban 4 për qind të marrjes së rekomanduar ditore të zinkut./abcnews.al
