Bashkimi Europian ka hequr kufizimet në importet e ushqimeve japoneze, disa javë përpara se Japonia të fillojë të shkarkojë ujërat e zeza në Oqeanin Paqësor. Kina dhe vende të tjera, megjithatë, kanë kërcënuar të kufizojnë më tej importet japoneze të ushqimeve të detit nëse vendi vazhdon me projektligjin.
Njoftimi i BE-së erdhi pas bisedimeve në një samit në Bruksel midis presidentit të Këshillit Europian, Charles Michel, presidentes së Komisionit Europian, Ursula von der Leyen dhe kryeministrit japonez, Fumio Kishida.
Vendimi i BE-së për të hequr të gjitha kufizimet e mbetura, ndoshta muajin e ardhshëm, vjen disa ditë pasi Agjencia Ndërkombëtare e Energjisë Atomike (IAEA) miratoi planet e shkarkimit të ujit të Japonisë , duke thënë se masa do të kishte “një ndikim të papërfillshëm radiologjik mbi njerëzit dhe mjedisin“.
BE-ja ka hequr disa nga kufizimet e importit që nga viti 2011, kur centrali u godit nga një tërmet i fuqishëm dhe cunami, duke shkaktuar incidentin më të keq bërthamor në botë që nga Çornobili 25 vjet më parë.
Por që nga viti 2021, ajo ka kërkuar certifikata që tregojnë nivelet e izotopeve radioaktive në kërpudhat e egra, disa lloje peshqish dhe bimë të egra të ngrënshme nga Fukushima dhe nëntë prefektura të tjera.
Komisioni Europian tha se kufizimet do të hiqen plotësisht, duke shtuar se Japonia do të vazhdojë të monitorojë prodhimin për radioaktivitet.
Vendimi i BE-së shihet si pjesë e një përpjekjeje për të bërë përparim në heqjen e barrierave tregtare japoneze ndaj mishit të viçit, frutave dhe perimeve të BE-së, aksesi i të cilëve në Japoni është i kufizuar nga rregullat e sigurisë ushqimore.
/abcnews.al
