Forcat izraelite arrestuan 5 peshkatarë palestinezë në brigjet e Rripit të Gazës të bllokuar.
Në lajmin e agjencisë zyrtare palestineze WAFA, thuhet se forcat e Marinës izraelite kanë ndërhyrë në mëngjes ndaj peshkatarëve që po peshkonin pranë Gazës.
Në lajmin ku thuhet se forcat izraelite arrestuan 5 peshkatarë palestinezë dhe sekuestruan varkat e tyre, theksohet se Marina izraelite synon çdo ditë peshkatarët që peshkojnë në Rripin e Gazës.
Gjithashtu u theksua se peshkatarët palestinezë janë në gjendje ku nuk mund të peshkojnë në det të Gazës për shkak të ndërhyrjeve të vazhdueshme të forcave izraelite.
Izraeli që nga viti 2006 ka bllokuar Rripin e Gazës, ku jetojnë rreth 2 milionë palestinezë, nga toka, deti dhe ajri.
Sipas Ministrisë palestineze të Bujqësisë, peshkimi njihet si një nga mjetet kryesore të jetesës në Gaza, ku ka rreth 4.000 peshkatarë.
Sipas raporteve të të drejtave të njeriut, Izraeli përveç abuzimeve të tjera shpesh ndalon peshkatarët në Gaza dhe konfiskon varkat e tyre. Qeveria e Tel Avivit gjithashtu redukton kohë pas kohe distancën e peshkimit të peshkatarëve në Rripin e Gazës.
Sipas Marrëveshjes së Oslos të nënshkruar ndërmjet Organizatës për Çlirimin e Palestinës dhe Izraelit në vitin 1993, palestinezët kanë të drejtë të lëvizin lirshëm deri në 20 milje nga Rripi i Gazës pa iu nënshtruar asnjë ndërhyrjeje izraelite, por qeveria izraelite i pengon peshkatarët palestinezë nga kjo e drejtë.
