Ka përfunduar për këtë javë gjykimi ndaj ish-krerëve të Ushtrisë Çlirimtare të Kosovës(UÇK). Procesi në Dhomat e Specializuara në Hagë do të vazhdojë të hënën e 15 majit, me dëgjimin e dëshmitarëve të Zyrës së Prokurorit të Specializuar(ZPS).
Në seancën e sotme e ka vazhduar dëshminë e tij dëshmitari i prokurorisë i cili mban kodin 4748, shkruan Kosova Press.
Për të tretën ditë me radhë ai ka dëshmuar në seancë të mbyllur për publikun. Për seancën e sotme është paraparë që ai të përgjigjet në kundërpyetjet e mbrojtjes së të akuzuarve.
Megjithatë, seanca ka filluar me një urdhër nga kryegjykatësi Charles L Smith, i cili është dhënë po ashtu në seancë private.
Në procesin gjyqësor kandër Hashim Thaçit, Kadri Veselit, Jakup Krasniqit e Rexhep Selimit, deri tani janë dëgjuar tre dëshmitarë të prokurorisë. Dëshmia e tyre nuk është bërë e ditur për publikun dhe të njëjtit kanë dëshmuar nën masa mbrojtëse.
Ish-krerët e UÇK-së, për të cilët prokuroria pretendon se kanë kryer krime lufte, kanë qenë të pranishëm në sallën e gjyqit në Dhomat e Specializuara të Kosovës në Hagë. Ata po gjykohen pas një procedure paraprake që ka zgjatur më shumë se dy vjet.
Gjatë kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm.
