Avionët ushtarakë spanjollë janë në gatishmëri dhe gati për të evakuuar rreth 60 shtetas spanjollë dhe rreth 20 civilë nga vende të tjera nga kryeqyteti i Sudanit, Khartoum, në mes të konfliktit të armatosur atje, tha të premten Ministri i Jashtëm Manuel Albares.
Luftimet që shpërthyen gjashtë ditë më parë në Sudan kanë vrarë të paktën 413 persona dhe kanë plagosur 3,551 të tjerë, sipas Organizatës Botërore të Shëndetësisë. Pa arritur një marrëveshje armëpushimi, vendet e huaja, përfshirë Shtetet e Bashkuara, nuk kanë qenë në gjendje të largojnë qytetarët e tyre nga Sudani.
“Çdo ditë që kalon, intensiteti i luftimeve po rritet dhe kjo është arsyeja pse nuk është bërë ende i mundur organizimi i një operacioni evakuimi”, tha Albares në një konferencë të përbashkët për shtyp me homologen e tij gjermane Analena Burbock në Berlin.
Megjithatë, avionët ushtarakë janë gati të vazhdojnë me evakuimin e civilëve dhe do të veprojnë në rastin e parë, shtoi ai.
Albares tha gjithashtu se furnizimet janë siguruar për ambasadën spanjolle dhe rezidencën e ambasadorit në Khartoum dhe masat e sigurisë rreth ndërtesave diplomatike janë shtuar.
Një shtetas spanjoll i cili ishte në një varkë në Sudan është transferuar në mënyrë të sigurt në një vend tjetër, shtoi ai.
