Dani Alves mbetet pas hekurave në burgun Brians 2, i vendosur në Sant Esteve Sesrovires, pranë kryeqytetit katalanas të Barcelonës.
Ai u dërgua në burg më shumë se një javë më parë pasi u akuzua për një sulm të dyshuar seksual në një klub nate. Avokati i tij, Cristabal Martell, pritet të bëjë një apel për të kërkuar lirimin e përkohshëm të mbrojtësit të djathtë brazilian.
Ndërkohë, “La Vanguardia” ka publikuar këtë të dielë një artikull në të cilin zbulon se si jeta e Alves është në burg, sipas burimeve të shumta, një përzierje e personave zyrtarë, jozyrtarë, brenda dhe jashtë qendrës së vuajtjes së dënimit.
Gazeta katalanase ka bërë me dije se “përshtatja e Alves po bëhet shembullore”.
Ata madje zbulojnë se Alves, i cili u arrestua më 20 janar, i akuzuar për një sulm seksual të kryer në klubin e natës Sutton në Barcelonë më 30 dhjetor, ka luajtur tashmë ndeshjen e tij të parë të futbollit me të burgosurit e tjerë.
Kjo ndodhi të enjten e kaluar dhe prania e yllit brazilian ngjalli një pritshmëri të madhe në oborrin e burgut tek bashkëvuajtësit e tij të burgosur, të cilët donin ta shihnin duke luajtur.
Sipas “La Vanguardia”, Alves, i cili mbahet në paraburgim pa kusht, ndan një qeli me dikë që tashmë e njeh. Ai është një burrë brazilian i njohur si Coutinho , i cili ishte truproja i Ronaldinhos në disa nga klubet e natës së Barcelonës.
Ndërkohë, ‘Ya es mediodía’ ka raportuar se Alves ka blerë gjërat e nevojshme me kartën e burgut prej 100 euro.
Blerjet e tij përfshijnë artikuj të tillë si katër konserva ton, katër kos, një shishe shampo, një deodorant dhe disa pije energjike./ h.ll/abcnews.al
