Vajzat dhe gratë në Forcat e Armatosura të Shqipërisë i janë bashkuar fushatës sensibilizuese për luftën kundër kancerit të gjirit. Në një videomesazh për të gjitha gratë, publikuar nga Ministri i Mbrojtjes Niko Peleshi, Zv.Shefja e Shtabit të Përgjithshëm të FA, gjeneralmajor Manushaqe Shehu si dhe vajza e gra në uniformë u bëjnë thirrje të gjitha grave shqiptare të kryejnë kontrollet shëndetësore për të shmangur një rrezik që mund t’ju kanoset nesër.
Në mesazhin që Ministri Peleshi ka shpërndarë shprehet: “Tetori, muaji i sensibilizimit kundër kancerit të gjirit edhe në Forcat e Armatosura. Pa gruan s’ka të ardhme! Ekzaminimi i hershëm shpëton jetë!”
Duke vënë theksin te parandalimi i kësaj sëmundjeje, vajzat dhe gratë në uniformë ftojnë në këtë videomesazh çdo grua që të kryejë mamografinë, jo vetëm gjatë muajit tetor, në qendrat shëndetësore, por edhe në pikat e mamografive të lëvizshme, që janë vendosur në qytete të ndryshme të vendit.
/abcnews.al/
