Kryetari i zgjedhur ukrainas i Khersonit, Ihor Kolykhaiev, u arrestua të martën, sipas zyrtarëve pro-rusë në qytet, disa orë përpara se administrata e rajonit e mbështetur nga Rusia të njoftonte planet për një referendum.
Një zyrtar në administratën e përkohshme të rajonit Kherson, Kateryna Gubareva, konfirmoi se Kolykhaiev ishte arrestuar. Kolykhaiev ka qëndruar në qytet gjatë gjithë pushtimit, megjithëse autoritetet e mbështetura nga Rusia e larguan atë nga detyra.
Kirill Stremousov, nënkryetari i administratës ushtarako-civile të rajonit Kherson, i mbështetur nga Rusia, tha se Kolykhaiev ishte paraqitur si mirëbërës por “bëri çdo përpjekje për të siguruar që disa njerëz të vazhdonin të besonin në kthimin e neo-nazizmit”, duke përsëritur pretendimet që i bëjnë jehonë justifikimit të pabazë të presidentit rus Vladimir Putin për luftën.
Fjala e parë për ndalimin e Kolykhaiev erdhi nga këshilltarja e tij, Halyna Liashevska, e cila postoi në Facebook të martën se ai kishte mbërritur “në një nga institucionet komunale ku punonin punonjësit e mbetur të komitetit ekzekutiv të qytetit. Sapo ai doli nga makina u ndalua menjëherë nga rojet e armatosura ruse”. /abcnews.al
