Kina po i ofron qytetarëve të saj shpërblime deri në 15 mijë dollarë për informacione rreth njerëzve që rrezikojnë sigurinë kombëtare, ndërsa autoritetet intensifikojnë një fushatë shumëvjeçare për të eliminuar atë që ata i shohin si kërcënime në rritje nga spiunazhi i huaj dhe “forcat armiqësore.”
Informatorët e suksesshëm mund të marrin “shpërblime shpirtërore” në certifikata ose “shpërblime materiale” në para, sipas rregullores të publikuar nga ministria e sigurimit të Shtetit të hënën.
Shpërblimet në para klasifikohen në katër nivele bazuar në vlerën e informacionit, duke filluar nga më pak se 10,000 juanë (1,500 dollarë) në më shumë se 100,000 juanë (15.000 dollarë).
Këshillat duhet të jenë specifike për njerëzit ose veprimet e përfshira dhe informacioni duhet të jetë i ri për autoritetet.
Raportimet mund të bëhen personalisht, online, me postë ose nëpërmjet linjës telefonike të sigurimit të shtetit.
Për vite të tëra, autoritetet kineze kanë inkurajuar publikun të informojë mbi spiunët e huaj dhe bashkëpunëtorët e tyre kinezë përmes propagandës dhe fushatave nxitëse.
Në vitin 2017, qeveria komunale e Pekinit filloi të ofrojë shpërblime deri në gjysmë milioni juanë (75,000 dollarë) për këdo që ndihmonte për të ekspozuar një spiun.
Brenda një viti, autoritetet kishin marrë rreth 5,000 raporte dhe shpërndanë shpërblime për informatorët, duke filluar nga studiuesit shkencorë te shoferët e taksisë, sipas Pekin News të drejtuar nga shteti.
Masat e reja synojnë të standardizojnë shpërblime të tilla dhe të motivojnë publikun, tha një përfaqësues i ministrisë së Sigurimit të Shtetit për Legal Daily, një gazetë shtetërore.
“Formulimi i masave ndihmon në mobilizimin e plotë të entuziazmit të publikut të gjerë për të mbështetur dhe ndihmuar në punën e sigurisë kombëtare”, citohet të ketë thënë përfaqësuesi i ministrisë.
CNN shkruan se rregulloret vijnë pasi zyrtarët kinezë dhe media shtetërore shtyjnë narrativën se Kina është nën kërcënim të rëndë dhe të vazhdueshëm nga “forcat e huaja armiqësore”, të cilat supozohet se po kërkojnë të depërtojnë dhe minojnë vendin në çdo mënyrë të mundshme.
“Siguria kombëtare e Kinës është përballur me një situatë të rëndë dhe komplekse. Në veçanti, agjencitë e huaja të inteligjencës dhe forcat armiqësore kanë intensifikuar ndjeshëm aktivitetet e tyre të infiltrimit dhe spiunazhit me mjete më të ndryshme dhe po synojnë zona më të gjera, duke paraqitur një kërcënim serioz për sigurinë kombëtare të Kinës.” tha përfaqësuesi i ministrisë.
Dyshimi në rritje i Kinës ndaj ndikimeve të huaja buron pjesërisht nga rivaliteti i saj gjeopolitik në rritje me Perëndimin, veçanërisht Shtetet e Bashkuara.
Përpjekjet e Xi për të forcuar sigurinë kombëtare filluan një vit pasi ai erdhi në detyrë. Në nëntor 2013, ai ngriti një Komision të fuqishëm të Sigurisë Kombëtare, të cilin ai e drejton, për të udhëhequr përpjekjet dhe për të koordinuar më mirë krahët e burokracisë së sigurisë së vendit./abcnews.al/
