Një hetim ka nisur për të zgjidhur misterin pasi më shumë se 100 njerëz që ndoqën një shkollë të mesme në Neë Jersey, u prekën nga një formë e rrallë e kancerit në tru, vite pasi u diplomuan ose punuan atje. Kjo u zbulua nga një ish nxënës i shkollës së mesme Colonia në Woodbridge, Al Lupiano, tani 50 vjeç, i cili u prek nga një tumor rreth 20 vjet më parë, raporton Daily Mail.
Ai fillimisht nuk mendoi asgjë për këtë derisa gruaja e tij u diagnostikua me të njëjtën formë të glioblastomës, ndjekur më pas nga motra e tij, e cila gjithashtu u sëmur me tumorin agresiv, duke i marrë përfundimisht jetën muajin e kaluar. Ai zbuloi 102 njerëz që kishin studiuar në këtë shkollë midis viteve 1975 dhe 2000, të cilët kishin vuajtur nga i njëjti lloj kanceri.
“Në gusht të vitit të kaluar, mora lajmin se motra ime kishte tumor në tru. Fatkeqësisht, rezultoi se ishte glioblastoma e fazës 4. Dy orë më vonë, morëm informacion se gruaja ime gjithashtu kishte një tumor primar të trurit. Fillova të bëj disa kërkime dhe të tre u bënë pesë, pesë u bënë shtatë, të shtatë u bënë 15,” tha Lupiano.
Pasi motra e tij vdiq fatkeqësisht më pak se një muaj më parë, ai postoi në Facebook duke u bërë thirrje të gjithë studentëve të shkollës së mesme Colonia të pyesnin nëse të tjerët kishin tumore në tru dhe përgjigja ishte tronditëse.
“Ajo që më duket alarmante është se ka vërtet vetëm një lidhje mjedisore me tumoret parësore të trurit dhe kjo është rrezatimi jonizues. Nuk është ujë i kontaminuar. Nuk është ajër. Nuk është diçka në tokë. Nuk është diçka që na bëhet për shkak të zakoneve të këqija,” tha Lupiano.
John McCormac, kryebashkiak në Woodridge, thotë: “Mund të ketë një problem real këtu dhe qytetarët duhet ta dinë nëse ka rrezik. Të gjithë jemi të shqetësuar dhe duam t’i shkojmë deri në fund. Kjo nuk është normale”. /abcnews.al
