Juventusi arriti të siguronte një 3 pikësh me shumë vlera ndaj Sampdorias në transfertë, duke qenë larg vendit të parë vetëm 4 pikë.
Pas kësaj ndeshjeje trajneri Misimiliano Allegri ishte shumë i lumtur për fitoren, ndërsa vlerësoi të tijtë për paraqitjen kundër Sampdorias.
Në fjalën e tij për “DAZN”, ai tha se ka qenë një ndeshje e mirë, por ekipi i tij duhet të përmirësohet në momentin që ka nevojë për të kontrolluar rezultatin.
“Në planin teknik, ka qenë një ndeshje e mirë. Duhet të përmirësohemi në momentin që ne kemi nevojë për të kontrolluar rezultatin. Nevojitet më tepër vendosmëri dhe vetëbesim tek lojtarët.
Të fitonim në këtë fushë nuk ishte aspak e thjeshtë dhe për ne shërben shumë ky 3 pikësh, për të konsoliduar vendin e katërt. Gjithashtu na jep mundësinë të përgatitemi me motivimin e duhur për ndeshjen e Championsit”
Më tej, Allegri ka folur për formën që po kalon Alvaro Morata, i cili realizoi dy herë. Gjithashtu disa fjalë edhe për mënyrën se si u përshtat Vlahovic, me aktivizimin nga stoli.
“Morata ka një nivel teknik që e bën të jetë mes më të mirëve në Europë. Mirëpo, nëse luan me shpinë nga porta, vuan shumë. Nëse ka hapësira, bën më mirë dhe shfaq plotësisht cilësitë e tij. Vlahovic hyri me ritmin e duhur në lojë, por duhet të kuptojë se kur është momenti për të vrarë ndeshjen”, deklaroi Allegri. /f.a/abcnews.al
