Rusia ka shënuar sot 80-vjetorin e fitores sovjetike ndaj Gjermanisë naziste në Stalingrad, një pikë kthese në Luftën e Dytë Botërore dhe ende një simbol i fuqishëm i patriotizmit rus.
Ngjarjet e përvjetorit do të mbahen pavarësisht luftimeve të ashpra mes forcave ruse dhe ushtarëve ukrainas, gati një vit pasi Rusia pushtoi ish-republikën sovjetike.
Sulmi kundër Ukrainës synon, siç pretendon Kremlini, “çmilitarizimin” dhe “denazistizimin” e vendit. Presidenti rus Vladimir Putin do të udhëtojë në Volgograd, për të marrë pjesë në festime.
Beteja e Stalingradit (1942-43), e cila konsiderohet si një nga më të përgjakshmet në histori me rreth dy milionë të vdekur nga të dyja palët, ndryshoi rrjedhën e luftës.
Kjo betejë, e cila filloi në korrik 1942, zgjati 200 ditë e netë. Stalingradi u shndërrua në gërmadha pasi u shënjestrua nga bombardimet ajrore nga trupat gjermane, dhe luftime veçanërisht të dhunshme u zhvilluan në rrugët e qytetit.
Më 2 shkurt 1943, trupat e Marshallit gjerman Friedrich Paulus u dorëzuan, të rrethuar nga Ushtria e Kuqe. Ishte hera e parë që trupat gjermane u dorëzuan gjatë Luftës së Dytë Botërore.
Ky përvjetor merr një rëndësi më të madhe simbolike ndërsa i afrohet përvjetorit të parë të fillimit më 24 shkurt 2022 të pushtimit rus të Ukrainës.
Vetë Putini nuk heziton të paralelizojë rezistencën sovjetike ndaj Hitlerit me pushtimin e Ukrainës.
/abcnews.al
