Mario Balotelli firmosi me Monza më datë 7 dhjetor dhe është gati të debutojë me ekipin e Serie B. Objektivi i klubit që drejtohet nga dyshja Berlusconi-Galliani, është ngjitja në elitën e futbollit italian dhe pritshmëritë ndaj sulmuesit të njohur janë të mëdha.
30-vjeçari qëndroi një kohë të gjatë pa u stërvitur, ndeshjen e fundit zyrtare e ka luajtur në muajin mars dhe situatën e tij e ka marrë në dorë Adriano Galliani. CEO i Monzas ka përgatitur një dietë të veçantë dhe Balotelli e ka zbatuar me përpikmëri.
Ky i fundit ka humbur 5 kg në 20 ditët e fundit dhe sot pritet të grumbullohet nga trajneri Brocchi. Monza pret Salernitanën e vendit të parë (16:00), një ndeshje shumë e rëndësishme. Balotelli pritet ta nisë nga stoli dhe do të aktivizohet gjatë ndeshjes.
Corriere della Sera raporton se lojtari i dërgon çdo mëngjes Gallianit të dhëna rreth situatës së tij, peshës trupore dhe përmirësimit që ka bërë. “E shoh shumë të motivuar, ka ardhur te Monza me qëllimet e duhura dhe gjithçka e ka vetë në dorë“, deklaron Adriano Galliani. /abcnews.al
