stephen curry

golden-state.jpg
ad min11:39 | 21/05/2019

Golden State do të luftojë sërish për titullin në basketbollin amerikan. Kampionia në fuqi eleminoi Portlandin, edhe pse i mungoi sërish Kevin Duranti.

Pesë finale të mëdha radhazi. Vetëm Boston Celtics ka arritur më shumë, ndaj Golden Sate Warriors duhet të jetë shumë krenare. Kampionia në fuqi e NBA-së do të luajë sërish për titull, pasi fitoi Konferencën Perëndimore.

U fitua edhe ndeshja e katërt, luajtur sërish në Portland, dhe u arrit ajo që në zhargonin amerikan quhet “fshesa”, apo “fshirja”, pra fitorja 4-0.

Golden State fitoi sërish respektin maksimal të basketbollit amerikan, të publikut dhe të analistëve, pasi nuk deshi të dinte nga mungesa e atij që mund të quhet ylli kryesor, Kevin Durant, të dëmtuar.

Suksesi ishte si në kohët e vjetra, mbështetur tek treshja Stephen Curry-Clay Thompson-Draymond Green, si dhe nga loja thellësisht kolektive. Fitorja e ndeshjes së katërt ishte 119-117, falë një tripëll dabëlli nga Stef Curry, me 37 pikë, 13 topa në tabela e 11 pasime për kosh.

Kapiteni Thompson pati 17 pikë, 6 topa në tabela, asiste e 2 vjedhje topi.

“Ne kemi qenë edhe më përpara në një pozitë të tillë, – u shpreh Curry, – kemi pasur 3 lojtarë kryesorë të dëmtuar, por secili prej nesh luajti edhe më fort deri në fund. Ne fare mirë mund të kishim pritur për ndeshjen e pestë, por nuk deshëm të prisnim kaq gjatë, ndaj vendosëm ta provonim”.

Curry vlerësoi lart lidhjen me Drejmond Green-in, duke theksuar besimin e ndërsjelltë që ata kanë tek njëri-tjetri. Green ishte gjithashtu vendimtar, duke realizuar edhe ai një tripëll dabëll, me 18 pikë, 14 topa në tabela e 11 pasime për kosh.

Jo vetëm kaq, por ai pati 3 vjedhje topi dhe dy bllokime gjuajtjesh, ndërsa është transformuar në mungesë të Durantit. Gjatë sezonit, Grin dhe Durant patën përplasje, dhe kjo mund të jetë një nga arsyet që ky i fundit thuhet se dëshiron të largohet nga Golden State, ndoshta tek Nju Jorku. Tashmë, kampionët presin finalistin nga Lindja, që do të përcaktohet nga dueli Toronto-Miluoki./ABC News Albania 24/7

curry.jpg
ad min13:58 | 14/01/2019

Stephen Curry bëri një paraqitje të madhe për Golden State në fitoren e arritur në fushën e Dallasit. Ylli i kampionëve shënoi 48 pikë në një nga ndeshjet më të bukura të basketbollit amerikan.

Kur ai është i frymëzuar, gjëja më e mirë është t’i japësh topin. Kevin Durant ishte kaq i sigurt në momentin e madh të Stephen Curry, saqë ia ktheu fjalën edhe trajnerit të tij që i sugjeronte që të provonte të gjuante.

“Më mirë të gjuajë Curry”, tha Duranti dhe nuk u gabua.

Ylli shtatshkurtër, me numrin 30 në shpinë, shënoi plot 48 pikë, përfshi edhe 11 kosha nga largësia, duke I dhënë Golden State një fitore tepër të vështirë në fushën e Dallasit. Dueli i NBA-së përfundoi 119-114, me Kërrin që u tregua i saktë që nga fillimi deri në fund, dhe që shtoi edhe 6 topa të kapur në tabela, 5 pasime për kosh, 1 vjedhje topi e dy bllokime gjuajtjesh të rivalëve.

Jo vetëm kaq, por ai nuk e humbi asnjëherë topin gjatë 37 minutave që ishte në parket. Me 11 kosha tripikësh, Curry mbeti vetën 3 realizime larg rekordit të NBA-së, që mbahet nga kapiteni i ekipit të tij, Clay Thompson.

Ai u ndihmua nga Kevin Durant që shënoi 28 pikë, kapi 7 topa në tabela dhe shërbeu 5 asistë, ndërsa Thompson shtoi 16 pikë. Kjo formë e Curry e bëri të pavlefshme paraqitjen shumë të mirë të Luka Donçiçit për vendasit, që realizoi 26 pikë, ndërsa Harrison Barns shënoi 22.

Ky sukses bën që Golden State të ketë tani një seri prej 4 fitoresh radhazi, duke qenë në vendin e dytë në Konferencën Perëndimore. Në 18 Janar, pritet që në formacion të kthehet qendra DeMarcus Cousins, dhe kjo besohet se do t’i bëjë kampionët edhe më të fortë./abcnews.al

golden-state.jpg
ad min14:46 | 01/06/2018

Golden State fitoi ndeshjen e parë finale të basketbollit amerikan. Kampionët në fuqi përballuan një paraqitje të jashtëzakonshme të Lebron James-it

Ishte i vendosur të jepte shpirtin për të fituar.

Lebron James e dinte mirë se ky ishte ndoshta rasti i tij i fundit në karrierë për të realizuar një mrekulli e për të fituar titullin në NBA.

Nuk ka gjë më të rrezikshme sesa një kampion në versionin e tij maksimal, dhe Golden State e provoi në ndeshjen e parë të Finales së Madhe, edhe pse luajti në fushën e vet, edhe pse në fund fitoi.

Basketbollisti më i mirë i botës dha një tjetër provë nga ato që do të mbeten në histori, dhe me të cilat mund të vlerësohet si numri 1 i të gjitha kohëve, edhe mbi Michael Jordan-in.

Shënoi 51 pikë, kapi 8 topa në tabela, shërbe 8 pasime për kosh, në humbjen pas kohës shtesë, 114-124.

Lebron i bë i dyti lojtar në histori që shënon mbi 50 pikë në një ndeshje finale, i vetmi pas Jordanit.

James u bë i pari lojtar që shënon 51 pikë, kap 8 topa në tabela e jep 8 asistë në një sfidë të Finales së Madhe.

Tridhjetetrevjeçari mbetet i vetmi që mund ta bëjë një skuadër mesatare, kampione të NBA-së, si akush tjetër që nga kohët kur nisi të luhej basketbolli në Amerikë.

Me klasin dhe karakterin krejt të pazakonshëm, ai cilësohet si Maradonë i koshit, padyshim sportisti më i madh në botë sot për sot.

Sidoqoftë, as edhe një individ i tillë nuk mund ta bëjë historinë i vetëm.

Në Arenën e Oklendit, përballë tij ishte katërshja më e fortë e rruzullit, ajo që më në fund i mbijetoi mrekullisë.

Stephen Curry ishte sërish i pazëvendësueshëm duke shënuar 29 pikë, kapur 6 topa në tabela e shërbyer 9 asistë.

Talenti trupvogël ishte vendimtar me lojën e tij si një vallëzim, dhe me koshat nga distancat tepër të mëdha, në momentet kulmore.

Kevin Durant nuk ishte i jashtëzakonshëm, por bëri pjesën e tij.

Shënoi 26 pikë, kapi 9 topa në tabela e dha 6 asistë, duke vjedhur një top e duke bllokuar 3 gjuajtje të kundërshtarëve.

Kapiteni Klej Tompson pati 24 pikë, ndërsa Drejmond Grin bëri nga të gjitha, me 13 pikë, 11 topa në tabela, 9 asistë, 5 vjedhje topi, e 2 bllokime gjuajtjesh.

Në fund, Cleveland pati mundësi të fitonte, por Smith u ngatërrua duke bërë që koha e rregullt të përfundonte 107-107.

Në kohën shtesë, asgjë nuk mund ta ndalonte kampionen në fuqi, që kishte shumë më tepër alternativa, përballë Lebronit të lodhur.

Koshat erdhën njëri pas tjetrit dhe diferenca shkoi në 10 pikë, për t’u mbyllur në 124-114.

Ndeshja e dytë luhet duke u gdhirë e hëna, sërish në fushën e Golden State, në Oklend./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono