emmanuel macron

Vetëm 3 javë nga zgjedhjet e Parlamentit Europian, në Francë gara elektorale me gjasë do të jetë një “Déjà vu” e presidencialeve të vitit 2017, ku fitues u shpall Emmanuel Macron.

Sot, 2 vjet më pas beteja do të jetë sërish mes partisë së presidentit francez “La République en Marche” dhe forcës së ekstremit të djathtë të Marine Le Pen, “Le Rassemblement National”.

Sondazhet në Francë flasin për një rënie të lehtë të Macron me 1.5% nga viti 2017. Megjithatë presidenti vijonë të kryesojë garën me 22.5%, ndërsa Le Pen e ndjek fare pranë me 21.5%.

Por një tjetër projektim e nxjerr forcën euro-skeptike të Le Pen në vend të parë me 24%, me një avantazh prej 3 pikësh përqindje ndaj Macron që arriti në 21%.

Marine Le Pen mbështet fuqishëm frontin populist të kryesuar nga zv/kryeministri italian Matteo Salvini, që bëson se rimëkëmbja e Europës nis kryesisht nga dëbimi i emigrantëve.

Emmanuel Macron nga ana tjetër propozoi një marrëveshje të re Shengen me më pak vende, një lëvizje që shihet nga analistët si politikë për të kënaqur valën euroskeptike që po rritet gjithnjë e më shumë në Europë.

TV Klan

Presidenti i Serbisë, Aleksandër Vuçiç, duke folur para gazetarëve, pas përfundimit të Samitit në Berlin, tha se nuk ka asnjë lëvizje të re nga ky samit. Vuçiç konfirmoi se një takim tjetër i ngjashëm do të mbahet më 1 Korrik, më ftesë të presidentit francez Macron.

“Fjala e fundit e samitit të Berlinit ishte që të vazhdojnë bisedimet në një format të ngushtë me ndërmjetësimin e Bashkimit Evropian, Gjermanisë dhe Francës, në mënyrë që të gjendet një zgjidhje për të vazhduar dialogun”, ka deklaruar Vuçiç.

Ai ka shtuar se gjatë diskutimeve të djeshme nuk ka pasur asgjë përfundimtare dhe nuk është votuar për asgjë. Presidenti serb falënderoi liderët europianë Merkel dhe Macron, duke thënë se ishin shumë racionale, seriozë dhe të përgjegjshëm.

Vuçiç sqaroi se Serbia nuk kishte kushte në këtë takim për rifillimin e dialogut me Kosovën, përveç heqjes së taksës 100% për mallrat serbe, të vendosur që në Nëntor 2018 nga qeveria e Prishtinës./ABC News Albania

Nis në Berlin samiti i liderëve të Ballkanit Perëndimor, thirrur me ftesë të kancelares Merkel dhe Presidentit francez Macron.

Raportet e fqinjësisë në Ballkan si dhe kërkesa për vijimin e dialogut mes Prishtinës dhe Beogradit pritet të jenë temat më kryesore gjate diskutimeve në këtë samit.

Shqipëria përfaqësohet nga kryeministri Edi Rama dhe ministri në detyrë për Europën dhe Punët e Jashtme, Gent Cakaj. Ndërsa Kosova nga Presidenti Hashim Thaçi dhe kryeministri Ramush Haradinaj. Serbia dhe Mali i Zi gjithashtu do të përfaqësohen nga Presidenti dhe kryeministri.

Ndërsa Maqedonia e Veriut do të përfaqësohet nga kryeministri Zaev. Takimi i parë i këtij samiti është mes kancelares gjermane Angela Merkel dhe kryeministrit të Maqedonisë së Veriut, Zoran Zaev.

Më pas Merkel do të zhvillojë një bisedë me kryeministrin e Shqipërisë, Edi Rama, që do të pasohet nga një tjetër bisedë dypalëshe mes saj dhe presidentit Macron e që më pas do t’ia lërë vendin konferencës së përbashkët për shtyp në 17:30.

Më pas takimi me liderët e Ballkanit Perëndimor, ku do të marrin pjesë edhe shefja e Politikës së Jashtme të BE-së Federica Mogherini dhe Komisioneri Johanes Hahn do të nisë rreth orës 17:45 dhe parashikohet të zgjasë deri në orën 19:30. Brenda kësaj kohe, sipas axhendës së siguruar nga mediat kosovare, pritet të ketë edhe një darkë pune.

Ndërkohë presidenti i Serbisë Aleksandër Vuçiç pas takimit me përfaqësuesen e lartë të Bashkimit Europian, Mogherini, deklaroi se nëse Kosova do të heqë taksën e vendosur ndaj mallrave serbe, dialogu do të riniste të nesërmen./abcnews.al

Presidenti i Francës, Emmanuel Macron, do të zhvillojë një vizitë zyrtare në Serbi më 16 Korrik.

Kjo është konfirmuar mbrëmë, teksa Macron sot do të takohet me Presidentin e Serbisë, Aleksandër Vuçiç, në kuadër të Samitit të Berlinit, ku ndodhet edhe pala kosovare me Hashim Thaçin dhe Ramush Haradinajn.

Vizita e Presidentit francez në Serbi ka qenë e planifikuar nga viti i kaluar, por është shtyrë për shkak të punëve të brendshme të Francës. /klankosova

Samiti i Berlinit nuk do të sjellë një risi në marrëdhëniet mes Kosovës dhe Serbisë, por do të jetë një shans për rifillimin e dialogut të ndërmjetësuar nga Brukseli. Sipas presidentit Hashim Thaçi, kancelarja Merkel dhe presidenti Macron do nxisin palët për një marrëveshje të tipit Athinë-Shkup.

Një ditë para takimit të Berlinit, presidenti i Kosovës Hashim Thaçi ka deklaruar se ky samit nuk do të sjellë një proces të ri në marrëdhëniet Kosovë-Serbi, por do të kërkojë mundësi për zgjidhjen e problemeve duke marrë si shembull marrëveshjen ndërmjet Maqedonisë së Veriut dhe Greqisë.

“Në takim theks i veçantë do t’i jepet mundësisë së vazhdimit të dialogut ndërmjet Kosovës dhe Serbisë për arritjen e një marrëveshjeje gjithëpërfshirëse dhe përfundimtare, që do të sjellë stabilitet edhe më të madh në Ballkanin Perëndimor”, ka thënë Thaçi në profilin e tij në Facebook.

Kreu i shtetit të Kosovës ka theksuar se, pret nga kancelarja Merkel dhe presidenti Macron që të tregojnë mbështetje për liberalizimin e vizave për qytetarët kosovarë, si respektim i kontratës ndërmjet Bashkimit Evropian dhe Kosovës.

“Kosova i ka përmbushur të gjitha kriteret dhe e meriton lëvizjen e lirë si të gjithë qytetarët e tjerë të rajonit dhe kontinentit. Nëse diçka e tillë nuk ndodh, takimi i Berlinit do të jetë zhgënjyes për qytetarët e Kosovës”, ka thënë Thaçi. Presidenti ka shtuar se, në këtë takim do të kërkojë edhe dënimin e genocidit të shtetit serb në Kosovë në vitet 1998-1999.

“Ne do të fokusohemi në mundësitë e bashkëpunimit ekonomik dhe në forcimin e rendit dhe ligjit, në veçanti në luftën kundër korrupsionit dhe krimit të organizuar”, ka shtuar Thaçi./abcnews.al

Presidenti francez Emmanuel Macron u ka dhënë të drejtë protestuesve të lëvizjes Jelekët e Verdhë, duke premtuar se do të kryejë reforma për lehtësimin e qytetarëve nga taksat.

Presidenti francez Emmanuel Macron i ka dhënë përgjigjen e shumëpritur lëvizjes së Jelekëve të Verdhë. Në një fjalim të mbajtur mbrëmjen e së enjtes, ai premtoi masa të reja për të zgjidhur përplasjen, përfshirë këtu shkurtim taksash, një reformë në shërbimin civil dhe një përfaqësim më të drejtë të qytetarëve.

Gjithashtu, pavarësisht insistimit se në vend duhet të kthehet rendi, presidenti u shpreh i vetëdijshëm për një mungesë besimi tek sistemi shtetëror. Fjalimi i tij ishte planifikuar për më 15 Prill, por u shty për shkak të zjarrit që përfshiu katedralen Notre Dame të Parisit.

Macron pranoi se protestat e lëvizjes së Jelekëve të Verdhë kishin në thelb kërkesa të drejta. Edhe pse gjatë fjalimit pranoi se qeveria e tij mund të kishte marrë një kthesë të gabuar, ai insistoi se reformat e deritanishme të saj kishin qenë të drejta, por jo të shpejta sa duhet.

Presidenti tha se kishte mësuar shumë nga debatet kombëtare të mbajtura me qytetarët francezë në mbarë vendin, ndërsa shtoi se shkurtimi i taksave do të bëhet duke shkurtuar shpenzimet qeveritare.

“Por edhe qytetarët duhet të punojnë shumë për ta arritur këtë”, tha Macron.

Shefi i pallatit Elize shtoi më tej se i kupton shqetësimet e shoqërisë edhe sa i takon ndryshimeve të klimës dhe emigracionit. Protestat e Jelekëve të Verdhë filluan në nëntor për shkak të rritjes së çmimit të karburanteve.

Ato u përshkallëzuan në muajt në vazhdim dhe vijuan edhe gjatë këtij viti. Javën e kaluar, në përpjekje për t’u çliruar nga reputacioni i “presidentit të elitës”, Macron tha se do ta mbyllë Shkollën Kombëtare të Administratës, një shkollë ku janë arsimuar shumë presidentë të Francës, përfshirë vetë Macron./abcnews.al

Presidenti Donald Trump gjatë një telefonate i shprehu ngushëllime presidentit francez Emmanuel Macron për ngjarjen e rëndë shkatërruese në katedralen e famshme Notre Dame dhe ofroi ndihmën e SHBA për restaurimin e saj.

“Notre Dame do të vazhdojë të shërbejë si simbol i Francës, duke përfshirë lirinë e fesë dhe demokracinë e saj,” tha zëdhënësja e Shtëpisë së Bardhë Sarah Sanders në një deklaratë.

“Ne kujtojmë me mirënjohje në zemër kambanat e Notre Dame që ranë në 12 shtator 2001, si kujtesë solemne për sulmet tragjike të 11 Shtatorit në tokën amerikane. Kambanat do të tingëllojnë përsëri”, shtoi Sanders.

Presidenti Macron ka premtuar rindërtimin e katedrales, e cila konsiderohet ndër shembujt më të mirë të arkitekturës gotike europiane dhe vizitohet çdo vit nga më shumë se 13 milionë njerëz nga e gjithë bota./abcnews.al

Francezët po rifitojnë besimin tek presidenti i tyre Macron dhe më shumë se gjysma e tyre dëshirojnë përfundimin e protestave të “Jelekëve të Verdhë”. Janë këto të dhënat e sondazheve më të fundit të kryera në 20 dhe 21 Shkurt.

Sipas sondazheve më të fundit, popullariteti i presidentit francez Emmanuel Macron është kthyer në nivelet e para protestave të “Jelekëve të Verdhë”, me 32 për qind të francezëve që mendojnë se Macron është një president i mirë. Në momentin më të keq të protestave të “Jelekëve të Verdhë” kundër Macron, në Dhjetor, popullariteti i tij shënonte 27 për qind.

I njëjti sondazh i kryer mes 20 dhe 21 Shkurtit tregon se 55 për qind e francezëve mendojnë se protestat e “Jelekëve të Verdhë” duhet të ndërpriten. Në të shtunën e 15 të protestave, rreth 46 mijë persona manifestuan në të gjithë Francën kundër qeverisë dhe presidentit./abcnews.al

Është arrestuar në Francë ish-truproja dhe ish bashkëpunëtori i presidentit francez Macron, Alexandre Benalla. Ai akuzohet se ka shkelur urdhrin e gjykatës duke kontaktuar me persona të cilët i ishin ndaluar të takonte.

Alexandre Benalla, ish-bashkëpunëtor i presidentit francez Emmanuel Macron është arrestuar pasi akuzohet se ka shkelur urdhrin e gjykatës, pas dënimit të marrë për dhunën e ushtruar në protestat e 1 Majit të vitit të kaluar në Paris. Ndërkohë mediat franceze vijojnë të publikojnë skandale të tjera, ku mendohet të jetë i përfshirë ai. Sipas akuzave më të fundit ekzistojnë përgjime telefonike ku Benalla negocion kontrata me oligarkë rusë.

Ish-bashkëpunëtori i Macron është thërritur që të merrej në pyetje në prokurori pasi mendohet që ka pasur kontate me persona, të cilët autoritetet ia kishin ndaluar të takohej.

Sipas asaj që publikohet nga Mediapart, ish-truproja e presidentit francez ka negociuar personalisht kur ndodhej ende në Elize, një kontratë prej 294 mijë eurosh mes shoqërisë së sigurisë Mars të drejtuar nga miku i tij Vinsent Krase, dhe oligarkut rus Iskander Makhmudov, i konsideruar si një njeri shumë pranë Vladimir Putin. Të kontatuar nga Le Monde, as Benala dhe as Krase nuk kanë dashur të komentojnë akuzat./abcnews.al

Presidenti francez Emmanuel Macron ka humbur durimin me protestuesit Jelekverdhë, pas agresionit verbal që i bënë një intelektuali hebre në Paris. Në reagimin e tij, Macron ka deklaruar se veprime të tilla bien ndesh me vlerat historike të Francës.

Presidenti francez, Emmanuel Macron, ka dënuar thirrjet anti-semitiste të një grupi protestuesish të lëvizjes “Jelekët e Verdhë” ndaj një intelektuali të njohur. Ditën e shtunë, agjentë të policisë morën në mbrojtje filozofin Alan Finkel Kraut pasi u ndodh nën një rrebesh fyerjesh e ofendimesh për shkak të prejardhjes së tij.

Në reagimin e tij, presidenti Macron ka deklaruar se kjo sjellje përbën mohim absolut të vlerave që e bënë Francën të madhe dhe për rrjedhojë nuk mund të tolerohen. Disa dhjetëra mijëra persona morën pjesë në protestat anti-qeveritare të së shtunës. Policia përdori gaz lotësjellës për të vënë nën kontroll turmën dhe protestuesit e “Jelekëve të verdhë”, që mbushën rrugët për javën e 14-të rresht.

Në një moment, agjentë të policisë u shkëputën nga një barrierë dhe vajtën në mbrojtje të Finkel Kraut, i cili po fyhej ashpër nga të pranishmit. “Hebre i ndyrë” dhe “ik vrit veten” ishin disa nga ofendimet që u bënë në adresë të akademikut 69-vjeçar.

“U përballa me një urrejtje të egër dhe u tremba për sigurinë time. Për fat të mirë aty qëlloi policia”, ka treguar eksperiencën e përjetuar filozofi. Presidenti Makron e telefonoi menjëherë atë për t’i ofruar mbështetjen e tij. Ngjarja ndodhi pak ditë pasi ministri i Brendshëm francez kishte paralajmëruar se anti-semitizmi po përhapej si një helm në vend, pas një seri incidentesh të regjistruara kundër hebrenjve./abcnews.al

Older Posts

Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004F

Kontakt

Telefono

TE FUNDIT