Loading ...Policia e Shkodrës vijon punën për identifikimin e autorit që dhunoi me sende të forta drejtorin e Autoritetit Kombëtar të Ushqimit, Ramir Haderi, por dëshmia e këtij të fundit nuk ka ndihmuar grupin e hetimit.
Në dëshminë që ka dhënë përpara policisë, Ramir Haderi thotë se nuk e di kush e ka goditur.
“Isha duke ecur dhe po flisja në telefon, kur një person doli nga një rrugicë dhe më goditi me një send të fortë. Nuk arrita ta shoh, pasi u largua me shpejtësi.”. shkruan ai.
Nga goditja, drejtori i AKU ka marrë një dëmtim në vetull, për të cilin mori mjekim në spital dhe më pas u largua. Haderi ka deklaruar se nuk ka konflikte me askënd dhe se nuk e di arsyen e sulmit.
“Nuk e di përse më goditi. Nuk kam konflikte me njeri. Bëj punën normalisht.”, shtoi kreu i AKU. Policia e Shkodrës ka sekuestruar këtë të premte edhe kamerat e sigurisë pranë vendit të ngjarjes, por deri tani autori i dyshuar nuk është identifikuar.
Sipas policisë, një nga pistat kryesore është ajo e goditjes për shkak të detyrës, por nuk përjashtohen as pista të tjera.
Në muajin mars, drejtori Haderi dhe 9 punonjës të AKU Shkodër u përfshinë në një hetim lidhur me zhdukjen e rreth 95 tonëve misër të kontaminuar me aflatoksinë, të cilët ishin bllokuar nga autoritetet. Gjithashtu, gjatë javëve të fundit, AKU Shkodër ka kryer disa kontrolle, bllokime dhe gjoba ndaj subjekteve të ndryshme ushqimore.
Pas incidentit të dhunshëm ka reaguar Drejtori i Autoritetit Kombëtar të Ushqimit në Shkodër, Ramir Haderi, duke falënderuar qytetarët për mbështetjen dhe solidaritetin e treguar. Haderi shprehet se kjo situatë i jep edhe më shumë përgjegjësi për të vijuar detyrën.
“Detyra ime ndaj Shkodrës është shërbimi dhe mosdorëheqja përballë së keqes e kërcënimeve. Shkodra ka ditur gjithmonë të bëhet krah, besë dhe forcë e përbashkët për qytetin e saj, dhe unë, me përulësi, do të vazhdoj të ndjek atë rrugë me të njëjtin besim e përgjegjësi. Shpreh besimin tim të plotë tek Policia e Shtetit dhe organet përgjegjëse për zbardhjen e plotë të kësaj ngjarjeje dhe nxjerrjen përpara drejtësisë të porositësve të saj jo vetëm për mua, por për vetë qytetarët.”, shtoi ai.
/abcnews.al
