Ukraina mund të parashikojë bisedime me Rusinë për përfundimin e luftës vetëm në kushte të caktuara, tha presidenti Volodymyr Zelensky, në një intervistë të transmetuar sot, ndërsa konflikti po i afrohej ditës së 1 000-të.
Zelensky tha se një nga këto kushte është “që Ukraina të mos negociojë vetëm me Rusinë”.
”Në situatën aktuale, negociatat do të përfundonin keq për Ukrainën”, tha presidenti për radion publike të vendit ”Suspilne”.
“Nga ana jonë, ne duhet të bëjmë gjithçka që mundemi për të siguruar që kjo luftë të përfundojë vitin e ardhshëm, të përfundojë diplomatikisht”, tha ai.
Për të forcuar pozicionin negociues të Ukrainës, ai shpreson në ndihmë nga aleatët perëndimorë të vendit.
“Plani i fitores” i Zelenskit, të cilin ai e prezantoi jashtë vendit muajin e kaluar, i referohet “diplomacisë së vërtetë”.
Plani prej pesë pikash përfshin një kërkesë për një ftesë për t’u bashkuar me aleancën ushtarake perëndimore NATO përpara përfundimit të luftës.
Për më tepër, Ukraina do të riarmatoset masivisht dhe Rusia do t’i nënshtrohet sanksioneve më të forta.
Rusia nisi një pushtim të plotë të vendit të saj fqinj më 24 shkurt 2022 dhe aktualisht kontrollon rreth një të pestën e territorit të Ukrainës.
