Megjithëse ethet, kolla dhe vështirësia në frymëmarrje janë simptomat kryesore të koronavirusit, disa pacientë po shfaqin edhe probleme me trurin. Mjekët kanë vëzhguar se simptomat neurologjike, si goditje në tru apo dridhje, ndodhin te një grup i vogël njerëzish me Covid-19.
Në raportimet në SHBA, Itali dhe vende të tjera, vihet re se një pjesë e pacientëve përjetojnë goditje në tru, simptoma të ngjashme me encefalitin dhe mpiksjen e gjakut, si edhe ndjesi shpimi gjilpërash dhe mpirje. Në këto raste, pacientët patën këto simptoma para shfaqjes së etheve dhe problemeve me frymëmarrjen.
Të martën, mjekët në Detroit raportuan një tjetër rast shqetësues që përfshinte një punëtore femër të linjës ajrore në fund të viteve 50 me Covid-19. Ajo ishte e hutuar dhe u ankua për një dhimbje koke; ajo mund t’u tregonte mjekëve emrin e saj, por shumë pak, dhe u bë më pak e ndërgjegjshme me kalimin e kohës. Skanimet e trurit treguan ënjtje anormale dhe inflamacion në disa rajone, me zona më të vogla ku disa qeliza kishin vdekur.
Mjekët diagnostikuan një gjendje të rrezikshme të quajtur encefalopati akute nekrotizuese, një ndërlikim i rrallë i gripit dhe infeksioneve të tjera virale.
Akoma nuk dihet shumë për simptomat neurologjike, por ne jemi duke u përpjekur për të studiuar fenomenet, tha Dr. Sherry HY. Chou, një neurolog në Universitetin e Pittsburgh School of Medicine, i cili po udhëheq një ekip hetuesish për Shoqatën e Kujdesit Neurokritik.
Specialistët e neurologjisë thonë gjithashtu se është shumë herët për të dhënë deklarata përfundimtare ose për të identifikuar mekanizmat specifikë me të cilët koronavirusi i ri po ndikon në sistemin neurologjik.
Ndërkohë një studim në Wuhan zbuloi se pacientët përjetonin edhe marramendje, dhimbje koke dhe humbje të vetëdijes.
Për momentin, është ende e paqartë ndikimi i Covid-19 në tru dhe mbi këtë fushë po punohet. Shumica e njerëzve të prekur nga koronavirusi janë në gjendje normale neurologjikisht. Megjithatë raportimet, fillimisht në Kinë dhe më pas në Gjermani, Francë, Austri, Itali, SHBA dhe Holandë, nxjerrin në pah se një numër pacientësh shkuan në spital për të trajtuar problemet me sistemin nervor dhe më pas rezultuan se ishin pozitivë me Covid-19.
Në fakt, është e zakonshme që të moshuarit të përjetojnë konfuzion dhe të zhvillojnë probleme të tjera, mirëpo të tilla simptoma përgjithësisht nuk kanë lidhje me sëmundjet e aparatit të frymëmarrjes, gjë që nxit hulumtimin në këtë drejtim.
Dr Stevens theksoi se të gjitha shpjegimet mekanike në këtë pikë janë hipoteza sepse dihet kaq pak: “Mund të jetë aq e thjeshtë sa nivelet e ulët të oksigjenit në rrjedhën e gjakut”, që vijnë si rezultat i problemeve të frymëmarrjes, së bashku me një rritje të dioksidit të karbonit, i cili ” mund të ketë ndikim të rëndësishëm në funksionin e trurit dhe të çojë në gjendje konfuzioni dhe letargjie, “tha ai./abcnews.al
