Një 42-vjeçar shqiptar dhe një 22-vjeçar bullgar u arrestuan gjatë një operacioni të koordinuar nga Departamenti i Krimeve Pronësore të Drejtorisë së Sigurisë së Atikës, në Athinë, si anëtarë të një bande që kryente në mënyrë sistematike grabitje të armatosura në degët e bankave dhe dyqane lojërash fati, në zona të ndryshme të Atikës.
Të pandehurit kishin krijuar një organizatë kriminale që prej shtatorit të vitit 2021, që kryente grabitjet në fjalë me armë. Sa i përket mënyrës së kryerjes së tyre, një anëtar hynte me forcë në ambientet e ngjarjes me tiparet e fytyrës të mbuluar nga një kapele apo paruke, syze dielli dhe një maskë kirurgjikale.
Menjëherë më pas ai kërcënonte me pistoletë punonjësit e dyqanit përkatës dhe pasi merrte paratë nga kasa detyronte drejtuesin t’i hapte derën e sigurisë, nga ku arratisej. Aty pranë dhe për të mos ngjallur dyshime, ai ndërronte rrobat që vishte gjatë çdo grabitjeje dhe zakonisht vishte një jelek fluoreshent që i referohej një punonjësi të Bashkisë. Ikja e sigurt e autorit nga vendi i grabitjes sigurohej nga bashkëpunëtorët e tij të cilët e prisnin aty pranë. Në të njëjtën kohë, bashkëpunëtorët ngarkoheshin edhe me rolin e zjarrfikësit, duke njoftuar autorin për një lëvizje të mundshme të forcave të policisë në vendngjarje.
Nga kontrollet e kryera gjatë operacionit u sekuestruan: Një jelek portokalli me shenjën “projektet jeshile” që i referohej jelekut të një punonjësi të Bashkisë, veshje të veshura nga të pandehurit gjatë kryerjes së grabitjeve, një kartë identiteti false e një shtetasi të huaj, një motoçikletë e përdorur si mjet tranzicioni dhe arratisjeje nga vendet ku u kryen grabitjet, një pako me 1.5 gram kanabis, 3 celularë dhe 235 euro.
Që nga hetimi paraprak i Departamentit të Krimeve të Pronës, janë zbardhur 11 raste të grabitjeve në Nea Smyrni, Neo Kosmos, Dafni, Pagrati, Petralona dhe Mosçato. 8 nga të cilat kanë të bëjnë me degë bankash dhe 3 me lojëra fati.
Shuma totale e përfituar nga anëtarët e organizatës kriminale shkon në 76 548 euro. Bëhet me dije se 42-vjeçari është arrestuar në të kaluarën për shkelje të ligjeve të drogës, falsifikim dhe arratisje nga burgu, ndërsa 22-vjeçari është arrestuar për pranim dhe shpërndarje të produkteve të veprës penale. /abcnews.al
