Ernest Muçi është padyshim një nga talentet më të mëdha të Kategorisë Superiore dhe si i tillë në adresë të Tiranës kanë ardhur oferta të shumta për të blerë kartonin e sulmuesit. Panorama Sport zbulon se Young Boys është shumë e interesuar për talentin bardheblu dhe ka bërë ofertën më të lartë deri tani për 20-vjeçarin.
Tirana ka lënë të kuptohet më parë se dëshiron ta mbajë talentin deri në verë, por një ofertë tunduese mund t’i bëjë bardheblutë të ndryshojnë mendje e ta lënë të largohet brenda dy ditëve të ardhshme, kur mbaron edhe merkato e janarit.
Oferta e Young Boys është 600 mijë euro dhe Tirana për momentin nuk është “magjepsur” nga ky propozim. Refik Halili e vlerëson më shumë “xhevahirin” e tij dhe në këmbim të Muçit ai kërkon rreth 700 mijë euro, plus 10% të vlerës së kartonit në rast rishitjeje nga zviceranët.
Këta të fundit nuk janë të gatshëm t’i lënë Tiranës përqindje të kartonit, çka është edhe ngërçi i kësaj marrëveshje. Mbetet të shihet nëse në dy ditët e ardhshme do të ketë lëvizje të tjera nga Young Boys, që e ka parë Muçin të luajë në stadiumin e tyre në Play-Off të Europa League. Ikja e Muçit pritet të jetë një nga shitjet më të shtrenjta të Tiranës. /abcnews.al
