Wagner ka përfunduar dorëzimin e armatimit të tij për ushtrinë e rregullt ruse, njoftoi Ministria ruse e Mbrojtjes të mërkurën, më shumë se dy javë pas rebelimit të shkurtër të grupit mercenar.
Ministria tha se kishte marrë më shumë se 2,000 copë armatime, duke përfshirë tanke dhe raketa, dhe më shumë se 2,500 ton municione.
Dorëzimi erdhi pas një marrëveshjeje me Kremlinin, në të cilën Wagner dhe udhëheqësi i tij Yevgeny Prigozhin i dhanë fund rebelimit të tyre jetëshkurtër në fund të qershorit.
Luftëtarët e Wagner-it, të cilët morën pjesë në disa nga luftimet më të ashpra të luftës në Ukrainë, iu dha zgjedhja për të ndjekur Prigozhin në mërgim në Bjellorusi, për t’u bashkuar me forcat e armatosura të rregullta të Rusisë ose për t’u kthyer në shtëpi. Këto janë tre opsione që vetë Presidenti Vladimir Putin i kishte përshkruar në fjalimin e tij.
Prigozhin tha se veprimet e njerëzve të tij synonin të protestonin kundër korrupsionit dhe paaftësisë së udhëheqjes ushtarake ruse për të menaxhuar luftën në Ukrainë.
Rebelimi shihet gjerësisht si sfida më serioze për presidentin Vladimir Putin që kur ai u bë president i Rusisë në ditën e fundit të vitit 1999.
Kriza u qetësua me ndërmjetësimin e liderit bjellorus Aleksandër Lukashenko. Si pjesë e kësaj marrëveshjeje, e cila, sipas Kremlinit, ishte bërë për të shmangur gjakderdhjen, çështja penale kundër Prigozhin dhe luftëtarëve të tij u pushua.
