Loading ...
Gerd Gjinarari i njohur me nofkën Gerd Gjenerali, ka rënë në pranga nga autoritetet belge, paraditen e 15 qershorit.
Sipas burimeve për ABC News, ka pasur një bashkëpunim mes autoriteteve shqiptare dhe atyre belge për lokalizimin e vendndodhjes së të shumëkërkuarit Gerd Gjinari, i shpallur në kërkim ndërkombëtar prej shumë vitesh.
Gjinarari rezulton i dënuar në Itali për vrasjen e Naim Zyberit në vitin 1997. Ngjarja u regjistrua në një spital në Milano, ku Zyberi po merrte trajtim mjekësor.
Sipas dosjes, rezulton se skema ka qenë e mirëmenduar. Gjinarari dhe Arben Grori hynë në dhomën e spitalit duke u paraqitur si të afërm dhe të shqetësuar për gjendjen shëndetësore të Zyberit, ndonëse e kishin plagosur po të njëjtën ditë, por nuk arritën ta vrisnin, dhe brenda një buqete me lule kishin armën me të cilën kryen krimin.
Naim Zyberi ishte një emër i njohur dhe me peshë në botën e krimit.
Në lidhje me këtë ngjarje, Gjinarari u dënua me burgim të përjetshëm nga gjykatat italiane dhe në vitin 2014 u ekstradua në Shqipëri për të vuajtur dënimin.
Në 2019, ai u lirua me kusht nga Gjykata e Korçës. Më pas, Gjykata e Apelit e rrëzoi vendimin e lirimit, duke urdhëruar rikthimin e tij në burg për të vuajtur pjesën e mbetur të dënimit.
Pas këtij vendimi, Gjinarari nuk u paraqit për ekzekutimin e masës dhe u shpall në kërkim ndërkombëtar.
Teksa është arrestuar në Belgjikë, pritet tashmë ekstradimi drejt vendit tonë për t’u shlyer dënimin.
