Brenda makinës që u gjet e djegur mbrëmjen e sotme në fshatin Sherishtë në Vlorë pak minuta pas vrasjes së 38-vjeçarit Delon Troqe janë gjetur edhe armë zjarri tip kallashnikov që dyshohet se janë përdorur nga autorët.
Burime bëjnë me dije për ABC se viktima kishte konflikte të mëparshme dhe kjo është ndër pistat ku janë përqendruar hetuesit. 38-vjeçari u ekzekutua mbrëmjen e sotme përpara servisit të tij në qytetin bregdetar rreth orës 21:40 minuta.
Në lidhje me këtë ngjarje janë shoqëruar 10 persona, të cilët që ndodheshin në vendin e ngjarjes. ABC mësoi se 38-vjeçari pronar i servisit, sapo ishte kthyer nga Spanja dhe gjatë verës punonte me skaf me turistët në rivierën bregdetare të Jugut të vendit. Disa vite më parë ai ishte dënuar për drogë./mv.abcnews.al
