Ambasada e Mbretërisë së Holandës në Tiranë ka konfirmuar votimin e mbajtur pasditen e së mërkurës në Parlamentin holandez, që i kërkonte qeverisë të mos pranonte hapjen e negociatave të anëtarësimit me Shqipërinë. Megjithatë, përmes një njoftimi për shtyp, selia diplomatike i bën thirrje qeverisë shqiptare që të vazhdojë rrugën e saj.
“Ne jemi të vetëdijshëm se sa sfidues është procesi i anëtarësimit dhe do të vazhdojmë të mbështesim Shqipërinë në realizimin e reformave, sidomos në ato që kanë të bëjnë me sundimin e ligjit”, thuhet në deklaratën për shtyp.
Në të bëhet me dije se shteti holandez vlerëson hapat e ndërmarra nga vendi ynë, sidomos në lidhje me reformën në drejtësi dhe procesin e Vettingut, të cilin e cilëson të një rëndësie të veçantë dhe unik në rajon. Gjithashtu, ambasada konfirmon angazhimin e Holandës për perspektivën europiane të të gjitha vendeve të Ballkanit.
“Politika e zgjerimit të BE-së bazohet në kushte të drejta dhe të serta për t’u siguruar që reformat në vendet aspirante për t’u bashkuar me Unionin të jenë të qëndrueshme dhe të pakthyeshme”, vijon deklarata.
Në votimin e tij Parlamenti holandez i rekomandoi qeverisë se një vendim për hapjen e negociatave të anëtarësimit për Shqipërinë më 18 Qershor do të ishte i parakohshëm./ABC News Albania 24/7
