Në mbrëmje, ekuipazhi i Ocean Viking , që është anija humanitare e SOS Méditerranée, shpëtoi 113 persona . Ky është operacioni i parë i anijes që kur u ankorua në Francë në nëntor.
Midis të shpëtuarve janë 23 gra, disa prej të cilave janë shtatzënë, rreth 30 fëmijë të mitur të pashoqëruar dhe 3 foshnja, më e vogla prej të cilave është vetëm tre javëshe.
Organizata SOS Méditerranée, me seli në Marsejë, thotë se operacioni është zhvilluar gjatë natës, në ujërat ndërkombëtare, të cilat bien nën zonën e kërkim-shpëtimit të Maltës, afër zonës libiane. Emigrantët ishin në një gomone të mbingarkuar të zezë, në errësirë të plotë.
Anëtarët e OJQ-së, si dhe Kryqi i Kuq dhe Gjysmëhënës së Kuqe u kujdesën për emigrantët në bord.
‘‘Për momentin, Ocean Viking vazhdon të patrullojë dhe është ende shumë herët për të ditur se ku do të jetë në gjendje të zbarkojë të shpëtuarit’’, tha për AFP zëdhënësja e SOS Méditerranée Meryl Soti.
Në mes të nëntorit, 230 emigrantë u shpëtuan
Në mesin e nëntorit, Ocean Viking zbarkoi në Toulon, në Francën juglindore, 230 emigrantë që kishte shpëtuar midis Libisë dhe Italisë, pasi lundroi për tre javë në det në kërkim të një porti të sigurt.
Qeveria franceze kishte rënë dakord të mirëpresë anijen në mënyrë të jashtëzakonshme pasi refuzimi i Italisë ndezi tensione diplomatike midis dy vendeve.
Pasi u transferuan në një zonë të mbyllur, shumica e të shpëtuarve u liruan me vendim gjykate sepse ishin të mitur të pashoqëruar ose sepse iu dha azil në Francë.
Në fillim të vitit, 1,998 emigrantë humbën në Mesdhe, përfshirë 1,369 në Mesdheun qendror, rruga më e rrezikshme e ndjekur nga emigrantët në botë, sipas Organizatës Ndërkombëtare për Migracionin.
Çdo vit, mijëra njerëz që ikin nga vendi i tyre për t’i shpëtuar konfliktit ose varfërisë përpiqen të arrijnë Evropën duke kaluar Mesdheun nga Libia, bregdeti i së cilës është rreth 300 kilometra nga Italia.
