Vijojnë pa ndërprerje kërkimet për nxjerrjen e minatorit Muharrem Plaku 61-vjeç i mbetur ditën e djeshme në brendësi të një galerie në Zonën e Parë të Minierës së Bulqizës.
Në fakt shembja mendohet të ketë ndodhur rreth orës 10:00 të ditës së djeshme, dhe deri tani kanë kaluar më shumë e 30 orë dhe ende nuk është bërë e mundur gjetja e tij.
Për nxjerrjen e tij po punojnë disa grupe punëtorësh të asistuar nga grupe të Avari Shpëtimit, RISHM-it, dhe AKSEM Agjensia Kombëtare e Sigurisë Minierave. Sipas tyre nxjerrja mund të kërkojë kohë pasi sasia e mineralit është shumë e madhe dhe ka bllokuar totalisht galerinë.
Sipas disa minatorëve, mbrapa kamerave tregojnë se kolegu i tyre Muharrem Plaku ka qenë specialist minierash, ai ka qenë në momentet e fundit duke përgatitur vrimat për të kryer shpërthimin me dinamit sipas rregullores. Edhe pse kanë kaluar dy ditë ende nuk është zbuluar shkaku i shembjes së kësaj galerie.
Specialistë të Avari Shpëtimit thonë se është shembur e gjithë zona e “Dushkut” (emërtim teknik në galeri) ose mund të jetë shembur ndonjë nën-kat i plotë, pasi nga brendësia e galerisë nuk del mineral, por dhe plus inerte sipërfaqeje, ç’ka do të thotë se shembja është shumë e madhe.
Vështirësia më e madhe është sepse gryka e galerisë është shumë e ngushtë dhe e bën të pamundur të punojnë shpejt. Aty punohet nga dy punëtorë maksimumi duke u ndërruar shpesh dhe nxjerrin 2 deri 3 vagona material në orë. Minatorë të vjetër që njohin këto lloj shembjesh shprehen se kjo mund të zgjasë edhe me ditë si proces pastrimi.
Ata sërish theksojnë kushtet e sigurisë në galeri si shkaktarët kryesorë të aksidenteve. Policia e Bulqizës e cila është në vend ngjarje prej 2 ditësh, ka marrë në pyetje administratorin e kompanisë KADURTEX sh.p..k dhe po pret nxjerrjen e minatorit për të vijuar hetimet për zbardhjen e ngjarjes. /abcnews.al/
