Pritej një fitore e madhe, për të marrë “hak” për disfatën e sezonit të shkuar, që i shkaktoi humbjen e titullit, por nuk ndodhi kështu. “Verdhezinjtë” e Borussia Dortmund, nuk kanë shkuar më shumë se barazimi, 1 me 1, në “Signal Iduna Park”, ndaj skuadrës së Mainz, në përballjen e javës së 16-të të Bundesliga, duke e mbyllur kështu me shije “të hidhur” vitin kalendarik.
Të dy golat e barazimit 1 me 1 erdhën në pjesën e parë të sfidës, teksa fillimisht ishte “fantazisti” Julian Brandt, i cili shënoi një super gol nga goditja e dënimit, në minutën e 29’-të të sfidës dhe vetëm 14 minuta më vonë, qendërmbrojtësi holandez, Sepp van den Berg godet bukur me kokë,një krosim të Mwene, për të vendosur baraspeshën fillimisht në pjesën e parë e më tej në gjithë sfidën.
Falë këtij rezultati, “Verdhezinjtë” e mbyllin vitin kalendarik, në vendin e 5-të të renditjes, teksa ka grumbulluar 27 pikë, pas 16 javëve të para të kampionatit, ndërsa skuadra e Mainz ngjitet në kuotën e 10 pikëve, duke dalë momentalisht nga “zona e ftohtë” e kategorisë, duke u renditur në vendin e 15-të të tabelës. /i.m /abcnews.al
SHIKONI GOLAT:
Goli i Julian Brandt, 1-0:
Goli i Sepp van den Berg, 1-1:
