Manchester City dhe Atletico Madrid, kampionë respektivisht në Angli e Spanjë, zbritën sot në fushën e blertë dhe nisën rrugëtimin për të mbrojtur trofeun.
“Qytetarët” nuk e kanë nisur mbarë, pasi u mposhtën në transfertë nga Tottenham me rezultatin 0-1. Son Heung-Min ishte heroi i “Spurs”-ave, me golin e shënuar 10 minuta nga nisja e pjesës së dytë të takimit.
Sulmuesi koreano-jugor realizoi një gol mjaft të bukur në hyrje të zonës, ndërkohë që Manchester City si zakonisht e kontrolloi lojën dhe tentoi shpesh herë portën, por saktësia nuk ishte ajo që duhej. Në këto kushte Tottenham përfitoi dhe e nisi kampionatin me pikë të plota.
Në Spanjë Atletico Madrid kaloi me sukses ekipin e Celta Vigo me rezultatin 2-1. Kampionët shënuan të parët me Angel Correa, i cili ishte protagonist absolut në këtë duel.
Goli i tij i parë ishte fantastik dhe nuk u pasua nga ndonjë tjetër në pjesën e parë. Në fillimin e të dytës Celta Vigo fitoi një penallti, që u kthye në gol nga Iago Aspas. Barazimi nuk i shkonte për shtat ekipit të Diego Simeone.
Brena pesë minutash sërish Angel Correa shënoi për Atleticon, duke rikthyer epërsinë dhe duke i dhënë fitoren skuadrës së tij. /abcnews.al
