Milani vuajti jo pak, por ia doli të mposhtë Brescian jashtë fushe mbrëmjen e kaluar. Fitorja e tretë radhazi për kuqezinjtë e Piolit dhe vendi i gjashtë në renditje. Kualifikimi në Champions League nuk është më një ëndërr dhe Ibrahimovic me shokë do të tentojnë deri në fund për të realizuar këtë objektiv.
Ante Rebic shënoi golin e fitores së rëndësishme. Rrjeta e tretë në pak ditë për kroatin, i cili i dhuron një tjetër trepikësh ekipit të tij. Paraqitje fantastike bëri edhe Donnarumma me pritjet e tij, teksa Theo Hernandez vazhdon të konfirmohet një “raketë” në krahun e majtë.
22-vjeçari francez është goditja më e bukur e Paolo Maldinit në merkato dhe deri tani ka shënuar 5 gola në kampionat. Mbrojtësi i majtë numëron edhe dy asiste, teksa është golashënuesi më i mirë i ekipit të tij.
Kundër Brescias ishte pranë shënimit të golit të gjashtë, por u ndal vetëm nga traversa. Aksion fantastik i Theos në minutat e fundit, driblim ndaj kujtdo që i del para, askush nuk ia del ta frenojë dhe “predha” e tij u ndal në traversë. Kishte vite që nuk shihej një anësor i tillë te Milani dhe tifozët janë të lumtur që ai është pjesë e ekipit të tyre të zemrës. /abcnews.al
