Cagliari nuk ka ndërmend të ndalet. Ekipi sard e nisi kampionatin me dy humbje në shtëpi (kundër Brescias dhe Interit), ndërsa ecuria më pas ka qenë e mrekullueshme. Shtatë fitore dhe tre barazimi ka arritur Cagliari në 10 ndeshjet e fundit, teksa ka zhbllokuar edhe ndeshjen e sotme kundër Fiorentinës.
Vendasit kanë kaluar në avantazh kundër Fiorentinës në minutën e 17-të. Marko Rog ka finalizuar një aksion fantastik të Cagliarit. “Tiki Taka” e ishullorëve dhe topi në rrjetë nga mesfushori kroat. Nëntë minuta më pas ka ardhur edhe goli i dytë.
Autori është Fabio Pisacane. Mbrojtësi kërceu bukur me kokë pas një goditje këndi dhe mposhti portierin mik. Fitorja momentale e ngjit Cagliarin në vend të tretë me 24 pikë, duke parakaluar verdhekuqtë e Romës. /abcnews.al
