Dy herë në javë një traget mallrash do të operojë përmes portit të Shëngjinit. Kjo u arrit me një marrëveshje midis autoriteteve të Portit të Shëngjinit dhe atij të Ravenas në Itali.
Kamionët e mallrave do të mund të lëvizin drejt Italisë edhe nga Porti i Shëngjinit.
Një traget që do të lidhë portën detare të veriut me portin e Ravenas ka nënshkruar marrëveshje me portin e Shëngjinit për ta kryer këtë shërbim 2 herë në javë.
Drejtori i portit, Ermal Pacaj, ka shpjeguar se interesimi i kompanive për të operuar nga Shëngjini është i lartë, kjo edhe për shkak të kohës së shkurtër të përpunimit, tarifave dhe shkurtimimit të distancave për operatorët në veri.
Sipas tij, përdorimi i portit të Shëngjinit për lëvizjen e trajlave me mallra do të ndikojë në ndryshimin e imazhit të Shëngjinit si dhe do të japë ndikim në rritjen e të ardhurave për këtë port.
Pas mbërritjes së tragetit të mallrave, drejtuesit e portit të Shëngjinit do të vijojnë kontaktet edhe me operatorë të tjerë që të bëjnë pjesë të itenerarit të tyre për shkëmbimet e mallrave edhe portin e Shëngjinit./abcnews.al
