Uzbekistani njoftoi sot nënshkrimin e një kontrate dyvjeçare me kompaninë shtetërore ruse Gazprom për importimin e gazit natyror rus.
“Kompanitë shtetërore Uzgastrade dhe Gazprom kanë nënshkruar një kontratë dyvjeçare”, tha në një deklaratë Ministria e Energjisë së Uzbekistanit, duke sqaruar se kjo do të jetë hera e parë që vendi importon gaz natyror nga Rusia.
Sipas të njëjtit burim, dërgesat e gazit natyror do të fillojnë më 1 tetor, me një vëllim vjetor prej rreth 2,8 miliardë metra kub, përmes tubacionit të gazit natyror që lidh Rusinë me ish-republikat sovjetike të Azisë Qendrore.
Marrëveshja është nënshkruar në Shën Petersburg të premten dhe detajet e saj janë bërë të ditura sot.
Pas pushtimit rus të Ukrainës, importet e gazit rus nga Evropa ranë dhe tani Moska kërkon të drejtojë disa nga eksportet e saj te aleatët në Azinë Qendrore, veçanërisht Kazakistani dhe Uzbekistani.
Këto vende, pavarësisht rezervave të tyre të gazit natyror dhe naftës, po përballen me një krizë energjetike. Në muajt e fundit, Rusia ka deklaruar vazhdimisht se synon të krijojë një “bashkim gazi” me këto dy shtete.
