Unai Emery është rikthyer të flasë për Arsenalin. Trajneri spanjoll u shkarkua nga pankina e “Topçinjve” në nëntorin e kaluar dhe ndalet te Mesut Ozil në prononcimin e dhënë për Marca.
48-vjeçari tregon problemin e madh të fantazistit dhe analizon edhe ndryshimin që ka ndodhur në ambientin e klubit londinez pas largimit të tij nga drejtimi i skuadrës.
“Ozil është një futbollist i shkëlqyer, kjo është e qartë, por në Premier nevojitet një fizik i fortë. Paraqitjet e tij janë të paparashikueshme. Ozil ndodhet nën nivelin e lojtarëve të tjerë më të mirë momentalisht. Ka raste kur Arsenali luan shumë mirë me të në fushë, por herë të tjera… ai nuk ia del të bëjë diferencën.
Arteta ka një eksperiencë të madhe si futbollist dhe ka punuar në krah të Guardiolës, një trajner i nivelit të lartë. Arteta po luan më skemën 4-2-3-1, të njëjtën që përdorja edhe unë. Atmosfera armiqësore është zvogëluar pas largimit tim dhe ambienti është më i qetë tani. Rezultatet nuk janë ende më të mirat, por trajneri i ri ka nevojë për kohën e duhur“, thekson Unai Emery. /abcnews.al
