Ish-kryeministri italian Silvio Berlusconi është vënë në shënjestër të Ukrainës, duke e akuzuar atë për përhapjen e propagandës ruse, pasi tha se nuk do të kërkonte një takim me presidentin ukrainas Volodymyr Zelensky nëse ai do të ishte ende kryeministër.
Berlusconi, 86 vjeç, shpesh mburrej për miqësinë e tij me presidentin rus Vladimir Putin përpara se Rusia të pushtonte Ukrainën vitin e kaluar.
Në një deklaratë ditën e djeshme, Berlusconi tha se gjithçka që Zelensky duhej të bënte për të parandaluar luftën në Ukrainë ishte të “ndalonte sulmet” në territorin e kontrolluar nga separatistët e mbështetur nga Rusia në pjesën lindore të vendit.
“Akuzat qesharake të Berlusconit kundër presidentit ukrainas janë një përpjekje për të puthur duart e Putinit, të cilat janë të mbuluara me gjak deri në bërryla “, tha Oleh Nikolenko, një zëdhënës i ministrisë së jashtme të Ukrainës.
“Në të njëjtën kohë, kryeministri italian duhet të kuptojë se duke përhapur propagandën ruse ai po inkurajon Rusinë të vazhdojë krimet e saj kundër Ukrainës dhe për këtë arsye mban përgjegjësi politike dhe morale”, tha ai.
Ai akuzoi Berlusconin se po përpiqej të tregonte besnikëri ndaj diktatorit rus dhe hoqi një paralele me marrëdhëniet e ish-kryeministrit italian me liderin e ndjerë libian Muammar Gaddafi.
Nikolenko gjithashtu publikoi një foto të Berlusconit duke puthur dorën e Gadafit në vitin 2010.
Nikolenko përshëndeti deklaratën nga zyra e kryeministrit aktual italian Giorgia Meloni, e cila përsëriti mbështetjen “e vendosur dhe të sigurt” të qeverisë për Ukrainën.
/abcnews.al
