Udhëheqësit e Armenisë dhe Azerbajxhanit do të takohen javën e ardhshme në Bruksel, ku do të ketë një përpjekje të fundit për të siguruar një marrëveshje të qëndrueshme paqeje dhe për të zgjidhur mosmarrëveshjet e gjata mbi territorin e Nagorno-Karabakut.
Takimi i 14 majit midis kryeministrit armen, Nikol Pashinyan dhe presidentit azer, Ilham Aliyev pason bisedimet midis dy ministrave të Jashtëm të tyre që e shtynë Sekretarin e Shtetit të SHBA Antony Blinken të sugjeronte se një përparim ishte i mundur, shkruan Reuters.
Një njoftim në faqen e internetit të Këshillit të BE tha se një takim trepalësh me presidentin e Këshillit Charles Michel do të zhvillohej në selinë e BE-së.
Armenia dhe Azerbajxhani, të dy ish-shtetet sovjetike, kanë zhvilluar dy luftëra gjatë 30 viteve duke u fokusuar në Nagorno-Karabakh, i njohur si pjesë e Azerbajxhanit, por i populluar kryesisht nga armenë.
Në një konflikt gjashtëjavor në vitin 2020, i përfunduar me një armëpushim të ndërmjetësuar nga Rusia, Azerbajxhani rikuperoi territorin e humbur në luftën e parë që daton nga rënia e sundimit sovjetik. Përleshjet kufitare shpërthejnë periodikisht midis dy palëve./abcnews.al
